29 ноября 2016 г.
Çак кунсенче "Çĕр тата çынсем" халăх музейĕнче Тăманлă Выçли ялĕнчи алĕç ăстин Зинаида Васильевна Киргизован "Быть женщиной - великий дар" ятлă куравне уçрăмăр. Ăна ятарласа Аннемĕрсен кунне халалларăмăр.
Курма килнисем пурте ал ĕçĕсем тĕрлĕ енлине, авторĕ те маттур пулнине çирĕплетрĕç. Зинаида Васильевнăн ĕçĕсем яланах халăх умĕнче. Районта, ялĕнче иртекен куравсенче тата тĕрлĕ конкурссенче Зина аппан пултарулăхĕпе тăтăшах паллашма май пур.
Мероприятире Зинаида Васильевна пирки унăн çывăх юлташĕ тата тăванĕ Валентина Портнова каласа пачĕ. Пултаруллă хĕрарăма Тукай ял тăрăхĕнчи культура ĕçченĕсем илемлĕ юрăсем шăрантарса савăк кăмăл-туйăм парнелерĕç. Комсомольски районĕн централизациленĕ библиотека тытăмĕн директорĕ Инна Ядрова ăстаçăна курав уçăлнă ятпа саламласа Хисеп хучĕпе чысларĕ. Зина аппа та пуçтарăннисене хăйĕн ĕçĕсем пирки каласа пачĕ, декупаж мĕнлерех тумаллине мастер-класс ирттерсе вĕрентрĕ.
Зинаида Киргизован ал ĕçĕсен куравĕ раштавăн 20-мĕшĕччен ĕçлĕ, пурне те музея çитсе унпа паллашма чĕнетпĕр.
А.ПОЛЯКОВА.
Источник: "Каçал Ен"