29 ноября 2016 г.
Ноябрĕн 26-мĕшĕнче Шупашкарта Пĕтĕм Раççейри "Чăваш пики" конкурс иртрĕ. Вăл кăçалхипе улттăмĕш хут пулчĕ. Кăçал конкурса Ханты-Манси тата Ямал-Ненецк автономи округĕсенчен, Мурманск хулинчен, Самар, Чĕмпĕр, Тюмень облаçĕсенчен, Тутарстан, Пушкăрт, Крым Республикисенчен килнĕ тата, паллах, Чăваш Ен пикисем пулчĕç.
Хĕрсем пилĕк конкурсра тупăшрĕç. Малтан хăйсемпе паллаштарчĕç, унтан ăс-хакăл конкурсĕ иртрĕ. Кун хыççăн пикесем чăваш апат-çимĕçĕпе, чăваш тумĕпе паллаштарчĕç, хăйсен пултарулăхне кăтартрĕç.
Кăçал "Чăваш пики" ята Тутарстанри Çĕпрел районĕнчен килнĕ Ксения Романова тивĕçрĕ. Иккĕмĕш вырăна Пушкăртстанри Елена Садыкова, "Чи хỹхĕм пике" номинацире Крым пики Ксения Сергеева мала тухрĕ. Куракансем Канаш районĕнчи Мила Яковлевăна килĕштернĕ. "Çепĕç пике" - Элĕк районĕнчи Нелли Львова, "Ăс пике" - Пушкăртстан пики Дарья Степанова. Кăçал жюри пайташĕсем "Чăваш Ен тулашĕнчи чи пултаруллă пике" номинацие те палăртрĕç. Унта Чĕмпĕр облаçĕнчи Ангелина Адамовăпа Ямал-Ненецк автономи округĕнчи Екатерина Сафронова çĕнтернĕ.
Кăçал "Чăваш пики" конкурса пирĕн районтан Анат Тимĕрчкасси хĕрĕ Арина Галкина хутшăнчĕ. "Каçал" халăх фольклор ансамблĕ вара уява курма килнĕ халăха илемлĕ юррисемпе, тăпăр-тăпăр ташшисемпе савăнтарчĕ. Вĕсен кĕвви-çемми илĕртнипе сиксе тухса пĕрле ташша яракансем те пулчĕç. "Каçалсене" питĕ ăшшăн йышăнчĕç, йăх-несĕлсен пултарулăхне упраса усранăшăн, халăх умне кăларнăшăн тав турĕç.
Л.ШУРЯШКИНА.
Источник: "Каçал Ен"