Публикации » Çамрăксене çыхăнтаракан юхăм кирлех

22 ноября 2016 г.

 Октябрĕн 29-мĕшĕнче Çĕнĕ Мăрат вăтам шкулĕ ачасемпе çамрăксен "Раççей шкул ачисем" обществăпа патшалăх организацийĕн пилотлă лапамĕ пулса тăчĕ. Шкулта вĕренекенсем - активистсемпе волонтерсем - асăннă организацие çĕнĕ пуян опыта илес, Раççейри ытти шкулсен вĕренекенĕсемпе паллашса çыхăну тытас тĕллевпе кĕнĕ. Шкулти организацине ачасем Леонид Борисов ячĕллĕ "Çĕнĕ хум" ят пама шут тытнă. Юхăмăн тĕп ĕçĕсем 4 енĕпе пурнăçланса пыраççĕ, кашни енĕ уйрăм пайсенчен тăрать, кунта лидерсем - активистсем тăрăшаççĕ. Вĕсем тăтăшах тĕрлĕ мероприяти йĕркелесе ирттереççĕ.

Акă, иртнĕ эрнере Çĕнĕ Мăрат вăтам шкулĕнче 2-4-мĕш классенче вĕренекен ачасене Раççей шкул ачисен юхăмне савăнăçлă лару-тăрура йышăннă. Юхăмăн республикăри координаторĕ Наталья Иванова ачасене хăйсен ĕçне тивĕçлĕн пурнăçлама, пысăк çитĕнỹсем патне ăнтăлма сунчĕ. Линейка вĕçĕнче Раççей шкул ачисен юхăмĕн юррипе пурте флешмоб йĕркелерĕç. Мероприяти вĕçленсен вара юхăм участникĕсем çавра сĕтел йĕри-тавра пуçтарăнса малашнехи тĕллевсене сỹтсе яврĕç. Çавăнпа пĕрлех ачасен проектсем хатĕрлессипе йĕркеленĕ пултарулăх мастер-класне хутшăнма май пулчĕ, Раççейри Амăш кунĕн программине те çавăнтах йышăнчĕç.

Кăшт маларах шкулта вĕренекенсем "Приседайте на здоровье!", "Письмо другу", "Дети - детям!" Пĕтĕм Раççейри акцисене хутшăннă. Пурте пĕрле пуçтарăнса вĕсем Мускав хулинчи пĕр шкула коллективлă çыру янăччĕ, каялла килнĕ çырусене те хавхалансах вуланă.

Пĕтĕм Раççейри мероприятисене хутшăннисĕр пуçне шкул ачисем хăйсем те социаллă проектсем шутласа кăлараççĕ. Тĕслĕхрен, нумаях пулмасть активистсем сĕннипе шкулта водительсемпе çуран çỹрекенсем валли хатĕрленĕ листовкăсен конкурсĕ иртрĕ. Чи лайăххисене Тукай ял тăрăхĕн обществăлла вырăнĕсенче салатнă та.

Çĕнĕ Мăрат вăтам шкулĕнче асăннă юхăм нумай пулмасть çеç ĕçлеме пикеннĕ пулсан та, ачасем кунсерен хастартарах ĕçлени туйăнать. Вĕсем çĕнĕрен те çĕнĕ мероприятисем сĕнеççĕ, хăйсен шухăшĕсем пурнăçланччăр тесе нумай тăрăшаççĕ. Çавăнпа та çамрăксене çыхăнтаракан юхăмăн витĕмĕ пысăк.

В.ФИЛИППОВА.

Источник: "Каçал Ен"