15 ноября 2016 г.
Нумаях пулмась Мускавра культурăпа исскуствăсен "Меридиан" центрĕнче халăхсен хушшинчи "Тăван чĕлхепе тата патшалăх чĕлхипе юрлатпăр" конкурсăн супер-финалĕ иртнĕ. Унăн çĕнтерỹçи пирĕн ентеш Ксения Гришина пулса тăнă. Вăл Комсомольскинчи ача-пăча искусство шкулĕнче И.В.Спиридонова класĕнче ятарлă музыка пĕлĕвĕ илнĕ. Ксения хальхи вăхăтра Хусанти И.В.Аухадеев ячĕллĕ музыка училищинче вĕренет.
Чăваш пики Альбина Юрату поэтессăн вырăсла Раиса Сарпи куçарнă "Хăш юррине юрлам-ши?" сăввипе Вероника Арисова композитор кĕвĕленĕ юрра шăрантарнă. Продюсерĕ - Сергей Бреус.
Ксенияна хисеплĕ премие - "Раççей халăхĕсен туслăхĕ" статуэткăна Кремльти съездсен керменĕнче иртнĕ "Эпир пĕр шухăшлă" концертра панă. Ăна çавăн пекех корей халăхĕн Пĕтĕм Раççейри пĕрлĕхĕн председателĕ Василий Цо хăйĕн ятарлă парнипе чысланă.
Ку Ксюшăн пĕрремĕш пысăк çитĕнĕвĕ мар. Пике мĕн пĕчĕкренех микрофонпа яланлăха туслашнă, хăйĕн малашнехи пурнăçĕ мĕнлерех пуласса та палăртса хунă. Кăçалхи январь уйăхĕнче вăл Юрий Энтина саламласа хатĕрленĕ концерта хутшăннăччĕ, Иосиф Кобзонпа юрă юрланăччĕ. Çав мероприяти хыççăн хĕрача пире "Манăн çăлтăр çутăрах çунасса шанатăп" тесе каланăччĕ. "Тăван чĕлхепе тата патшалăх чĕлхипе юрлатпăр" конкурсра мала тухни çамрăк юрăçа ĕмĕчĕ патне тата та çывăхрах илсе пычĕ.
(ХАМ.ИНФ.)
Источник: "Каçал Ен"