11 ноября 2016 г.
Пирĕн ачасем мĕн те пулин пухма пикенсен эпир вĕсене час-часах "Плюшкин" тесе чĕнет-пĕр. Унсăр пуçне ача вăхăта пустуй пĕтерет тесе шутлатпăр. Ку шухăш тĕрĕсех-ши?
Коллекци пуçтарасси - тĕрлĕ япаласене тата вĕсем çинчен информацие системăласа пухасси. Коллекцисемпе интересленсе кайнă ачан астăвăмĕ, тимлĕхĕ, туйăмĕ, танлаштарасси, классификацилесси тата анализ тăвасси аталанаççĕ. Çавăнпа пĕрлех ача тĕллевлĕ, хистевлĕ, перекетлĕ пулма вĕренет.
Шкул умĕнхи ачасен коллекцийĕсене сăнасан япаласен куравĕсене те йĕркелеме май пур. Тĕслĕх вырăнне тĕнчери халăхсен пуканисен, календарьсен, самолетсемпе танксен, мотоциклсен, музыка инструменчĕсен, блокнотсен, журналсен, роботсен тата ыттисен куравĕсене илме, çавăнпа пĕрлех ку е урăх темăна тĕпе хурса ача сачĕсенче выляв кунĕсем те йĕркелеме пулать.
Коллекци пухасси тĕрлĕ япаласене пуçтарнипе кăна çырлахмаллине пĕлтермест. Ачасене интереслентерекен темăпа пĕлĕвне аталантарма пулăшмалла, хăйсен опычĕпе ыттисене паллаштарма вĕрентмелле.
Юлашкинчен вара мĕн пĕчĕкренех коллекци пухни ачана пулас профессине те час-часах суйласа илме пулăшать. Тĕслĕхрен, паллă конструктор Федор Васильевич Токарев 150 ытла хĕç-пăшал тĕслĕхĕсене тунă, вĕсем хушшинче пурте пĕлекен ТТ пистолет та пур. Мĕн пĕчĕкренех Токарев çар хĕç-пăшалĕсен макечĕсене пухнă иккен, тен, çакă унăн малашлăхне палăртма пулăшнă та.
З.МУДАРИСОВА,
Хырай Ĕнел вăтам шкулĕн воспитателĕ.
Источник: "Каçал Ен"