08 ноября 2016 г.
Ноябрĕн 3-мĕшĕнче районти "Çĕр тата çынсем" халăх музейĕнче "Искусство каçĕ" акци иртрĕ.
Акцие Комсомольски 1-мĕш вăтам шкулĕнче пĕлỹ пухакансем, райцентрти, ялсенчи библиотека ĕçченĕсем хастар хутшăнчĕç. Вĕсем чи малтанах музейри куравпа паллашрĕç, Ĕç çыннин çулталăкне халалланă сăнỹкерчĕксен выставки те вĕсемшĕн интереслĕ пулчĕ. Вĕренекенсем конкурса тĕрлĕ ĕç хатĕрленĕ, ашшĕсене, амăшĕсене, кукамăшĕсене, аслашшĕсене ĕç вăхăтĕнче ỹкерттернĕ. Шăпах искусствăсен каçĕнче музей директорĕ Алена Полякова "Ĕç çыннине мухтар" конкурс çĕнтерỹçисене Хисеп хучĕсемпе чысларĕ.
Искусство каçне районти ачасен искусство шкулĕн преподавателĕ Надежда Абдюшева ертсе пычĕ. Вăл пухăннисене пусмаран хитре шарф тума вĕрентрĕ. Вăл ăнлантарнă тăрăх, кăмăл пулсассăн, темĕнле хитре япала та ăсталама пулать. Библиотека ĕçченĕсем пусмана тĕрлĕ çĕртен çиппе çыхса хурса тата сăрласа илемлĕ шарф хатĕрлерĕç. Çак ăсталăха Надежда Владимировна хăйĕн вĕренекенĕсене те хăнăхтарнă. Вĕсем кашниех хăйсене валли шарф хатĕрленĕ.
А.ЕФРЕМОВА.
Источник: "Каçал Ен"