08 ноября 2016 г.
Иртнĕ кунсенче Пĕтĕм чăвашсен II "Асам" кинофестивалĕн ĕçне пĕтĕмлетнĕ. Чи сумлă парнене - Гран-Прие - Владимир Карсаков режиссерăн "Сурăм хĕрĕ" фильмĕ тивĕçнĕ. Тĕп сăнара калăпланă Ирина Вирьялова та кинофестивалĕн парнине тивĕçнĕ. Актера "Хĕрарăм рольне чи ăста вылякан" номинацире чысланă. Надежда Кирилловăна "Сурăм хĕрĕ" фильмра эпизодла хĕрарăм рольне ăста вылянăшăн наградăланă.
"Чи лайăх илемлĕ фильм" номинацире Елена Рябцева режиссер хатĕрленĕ "Принять удар" илемлĕ фильм çĕнтернĕ. Документаллă фильмсен хушшинче Юрий Сергеев режиссер хатĕрленĕ "История великого народа" палăрнă. "Чи лайăх кĕске фильм" номинацире Марина Карягинăн ĕçне чысланă, унăн "Çĕр çул иртсен" документаллă фильмĕ çĕнтернĕ. Анимациллĕ фильмсенчен Ольга Горюнова ертсе пынипе ачасем хатĕрленĕ "Как ловили луну" фильма палăртнă.
Чи ăста оператор - Анатолий Трофимов, чи ăста монтаж режиссерĕ - Елена Рябцева, чи лайăх сценарист - Юрий Михеев, чи ăста композитор - Илья Чесноков, чи ăста сасă режиссерĕ - Владимир Беляков, чи ăста ỹнерçĕ Татьяна Шаповалова тесе палăртнă. Арçын рольне чи ăста вылянăшăн вара Сергей Данилова ("В лесу" илемлĕ фильм) чысланă. Иккĕмĕш планри тата эпизодла рольсемшĕн Алексей Коротков, Наталья Козлова, Надежда Кириллова, Юрий Спиридонов парнесене тивĕçнĕ.
Кинофестивальте Александр Игнатьев, Сергей Сахаров, Юлия Сидорова çамрăк актерсене те палăртнă. Чăваш киноискусствине аталантарас енĕпе нумай вăй хунăшăн Сергей Мышев оператора тата Алексей Иванов продюсера чысланă.
Источник: "Каçал Ен"