03 ноября 2016 г.
5-7-мĕш классенче пĕлỹ пухакансем хаваслă стартсенче вăй виçрĕç. Еплерех кăна тупăшмарĕç пулĕ çамрăк спортсменсем: ункăпа баскетбол çăмхисене маларах кустарса çитерессипе те, урасене йĕлтĕр сырса спортзалăн тепĕр вĕçне чупса çитсе тĕл перессипе те, харăсах виçшер пысăк мечĕк йăтса чупассипе те, шурă хут листине алăсемпе тытмасăр йăтассипе те, тата ытти енĕпе. Çиччĕмĕшсем, паллах, пĕрремĕш вырăна алăран вĕçертмерĕç. Вĕсенчен кăшт çеç кая юлса улттăмĕшсем - иккĕмĕш, пиллĕкмĕшсем виççĕмĕш вырăнсене йышăнчĕç. Куракансем - шкул ачисемпе вĕрентекенсем - ăмăртакансене тупăшу вăхăтĕнче алă çупса хавхалантарчĕç, çĕнтерỹçĕсене те çак майпах саламларĕç. "Хаваслă стартсене" физкультура учителĕ Алексей Гаврилов ертсе пычĕ. Вăл кашни хутшăнакана хавхалантарчĕ. Каласа хăвар- малла, вĕренекенсене спортпа туслаштарас тесе нумай вăй хурать çамрăк вĕрентекен. Шкулта çеç мар, районти тĕрлĕ спорт ăмăртăвĕсене те хутшăнаççĕ Хырхĕррисем, малти вырăнсене те пĕрре мар йышăнаççĕ. Мĕнех, малашне те ăнăçу сунатпăр сире, çамрăк спортсменсем!
Г. БЕЛКОВА.
Источник: "Каçал Ен"