28 октября 2016 г.
Октябрĕн 20-мĕшĕнче Чăваш Енри Хĕрарăмсен совечĕ йĕркеленĕ "Наципе культура йăлисене сыхласа хăварас тата амăшĕнчен хĕрĕ патне çитерес" курав Комсомольски районĕн маçтăрĕсен япалисемпе пуянланчĕ. Халăх пултарулăхне кăмăллакансем ноябрĕн 1-мĕшĕчченех куравпа паллашма пултараççĕ.
Выставкăн пысăк пайне Çĕнĕ Мăрат вăтам шкулĕнчи кĕçĕн классен учителĕн Алина Афанасьевăн тата унăн хĕрĕсен Татьянăпа Анастасийăн ал ĕçĕсем йышăнаççĕ. Республикăри куравпа паллашма килнисем чунĕсене парса хатĕрленĕ тухьясене, хушпусене, кăкăра илемлетмеллисене тытса пăхмасăр иртсе каяймаççĕ. Наци костюмĕсем тăхăнтартнă пуканесем те курава наци сĕмĕ парнелеççĕ. Çавăнпа пĕрлех выставкăн тĕшши бисерпа тĕрленĕ картинăсем пулса тăнине пĕлтермеллех. Афанасьевсен çемйи кашни çулах районта та, республикăра та иртекен тĕрлĕ конкурссемпе куравсене тăтăшах хутшăнаççĕ.
Асăннă выставкăра Аслă Чурачăкри Просвирновсем-Лукияновсем тĕрленĕ картинăсем те пысăк вырăн йышăнса тăраççĕ. Тĕрĕ ăсти Елена Просвирнова та нимĕнле куравран-конкурсран юлмасть. Хĕрĕсене те - Алинăпа Аннăна - тĕрĕ искусствине мĕн пĕчĕкренех вĕрентнĕ. Вĕсем тĕрленĕ хирти утмăлтуратсене, розăсене чăн-чăннисенчен уйăрса илме те май çук.
Куравра Элпуç ялĕнчи Елена Комиссаровăн пусмаран тунă пуканисем те хăйсем патне илĕртеççĕ. Елена Ивановна хăйĕн ăсталăхĕпе Элпуçри культура çуртне кружока çỹрекен ачасене паллаштарать. Акă, нумаях пулмасть вăл "Ачасем тунă пуканесем" республикăри конкурсра 2-мĕш вырăн йышăнса килнине пĕлтерме кăмăллă.
В.КУРИЦЫНА.
Источник: "Каçал Ен"