28 октября 2016 г.
Октябрĕн 26-мĕшĕнче районта ĕçлĕ визитпа Чăваш Республикин патшалăх çурт-йĕр инспекцийĕн ертỹçи Виктор Кочетков пулнă.
Виктор Кочетков йĕркеленĕ ĕçлĕ канашлăва район администрацийĕн пуçлăхĕ Алексей Самаркин, капиталлă строительство, çурт-йĕр тата коммуналлă хуçалăх пайĕн начальникĕ Александр Краснов, Комсомольски ял тăрăхĕн пуçлăхĕ Юрий Митюков, "УК "Уютный дом" ООО учредителĕ Владимир Максимов, "Коммунальный сервис" ООО директорĕ Сергей Макаров хутшăннă. Вĕсем нумай хваттерлĕ çуртсенче капиталлă юсав ирттерес программа мĕнле пурнăçланнине, коммуналлă пулăшу парас ыйтусене сỹтсе явнă. 2017 çулхи январĕн 1-мĕшĕнчен çурт-йĕр тата коммуналлă пулăшушăн хывакан тỹлеве улшăнусем кĕртме палăртнине те асăнса хăварнă инспекци ертỹçи. Çавăн пекех çитес вăхăтра районти нумай хваттерлĕ çуртсенче пурăнакансемпе тĕл пулса çав çуртсен пурлăхĕпе усă курассине палăртас ыйтăва татса памалла.
Источник: "Каçал Ен"