28 октября 2016 г.
Октябрĕн 24-мĕшĕнче Чăваш Енре Пĕтĕм чăвашсен "Асам" II кинофестивалĕ уçăлчĕ. ЧР Кинематографистсен союзĕ, ЧР Культура министерстви тата Чăваш наци конгресĕ кинофорум пултаруллă çĕнĕ режиссерсем, сценаристсем, операторсем, актерсем тупма пулăшасса шанаççĕ.
"Чи лайăх илемлĕ фильм", "Чи лайăх документлă фильм", "Кĕске метражлă чи лайăх фильм" тата "Чи лайăх анимаци фильмĕ" номинацисенче çĕнтернĕ картинăсем Шупашкарта иртекен Пĕтĕм тĕнчери X кинофестивале хутшăнĕç.
"Асам" халăхсен туслăхне вăйлатма та май парĕ. Çапла тума конкурса хутшăнман программăпа Алтай, Якут, Казахстан, Болгари, Кăркăсстан, Тутарстанпа Пушкăртстан фильмĕсене кăтартни пулăшĕ.
Чăваш Республикин культура министрĕ Константин Яковлев "Асам" кинофестиваль çĕршывшăн, çавăн пекех республикăшăн пĕлтерĕшлĕ вăхăтра - Раççейри Кино çулталăкĕнче - иртнине палăртнă. "Кăçал республикăри пĕчĕк хуласенчи кинозалсен тытăмне самай аталантарма май килчĕ. Чăваш Ен Раççейри Кино искусствине пулăшакан фондран Улатăр, Çĕмĕрле, Канаш хулисенчи клубсем валли цифра оборудованийĕ туянма 15 миллион тенкĕлĕх субсиди илчĕ. Çитес вăхăтра асăннă çăмăллăхпа Çĕрпỹ, Сĕнтĕрвăрри районĕсем тата ыттисем те усă курма пуçлĕç", - тенĕ министр.
ЧР Патшалăх Канашĕн Председателĕ Валерий Филимонов "Асам" çĕнĕ ятсем тупма пулăшасса шаннине пĕлтернĕ.
Источник: "Каçал Ен"