21 октября 2016 г.
Çурт картишĕнче тротуар е парковка çукки, çул шăтăк-путăк пулни халăха пăшăрхантарать, паллах тата ыйтусем те çуратать. Ку проблемăсене пĕтерес тĕллевпе район тата ял тăрăхĕсен пуçлăхĕсем нумай тăрăшаççĕ, тĕрлĕ программăсене хутшăнаççĕ.
Паянхи куна Комсомольски ялĕ тата тăрăхĕ кашни кунах тенĕ пек хăтлăланса пырать.. Автомашинăсем нумайланнăран çуран çынна асфальтлă çулпа утма çук тата юрамасть те. Тăрсан-тăрсан вара çул çинче чăн-чăн вăрçăри пекех пулса тухать. Çак вăрçăра пĕри те парăнасшăн мар тата: водительсем çуран çỹрекенсене тапăнаççĕ, çуран çỹрекенсем руль умĕнчи çынсене ылханаççĕ. Ятлаçаççĕ-харкашаççĕ кăна мар, тепĕр чух тытăçсах каяççĕ. Çакнашкал ан пултăр тесе Комсомольски урамĕсенче кашни çулах çĕнĕ тротуарсем хута каяççĕ.
Акă, нумаях пулмасть Комсомольскинчен Кĕçĕн Каçал ялне çитерекен çул хĕррипе тротуар сарчĕç. Кунта 600 метра яхăн тротуара вăхăтра туса пĕтерессишĕн Канашри "Транспортник" ООО ĕçченĕсем тăрăшнă. Паянхи куна вара асăннă организаци специалисчĕсенех Садовăй урамран Комсомольски 2-мĕш вăтам шкулĕ патнелле тăсăлакан 500 метрлă тротуара тунă çĕрте курма пулать.
Çавăнпа пĕрлех Комсомольски ял тăрăхĕн территорине тирпей-илем кĕртес ĕç те малалла тăсăлать. Çак кунсенче Завод урамĕнчи 67А тата 67Б, Комсомольскинчи сельхозтехника территорийĕнчи 2-мĕш, "Октябре 70 çул" урамри 2 тата 4-мĕш çуртсенче пурăнакансем картишсенчи çĕнетнĕ çул тăрăх утма пикеннĕ. Асăннă çуртсенче пурăнакансемшĕн ку чăн-чăн уяв, мĕншĕн тесен кунти картишсене нумай çул юсаманнине пула кĕрхи тата çурхи тапхăрта подъездсем патнелле çитме йывăртарах пулнă.
Комсомольски ял тăрăхĕн пуçлăхĕ Юрий Митюков пĕлтернĕ тăрăх, подрядчиксем хăйсен ĕçĕсене вăхăтра тата çỹллĕ шайра пурнăçлаççĕ.
Н.БЕЛКОВА.
Источник: "Каçал Ен"