18 октября 2016 г.
Нумаях пулмасть хаçат страницисенче Раççей Федерацийĕн Вĕренỹпе ăслăлăх министерстви 2015-2016 вĕренỹ çулне пĕтĕмлетсе çĕршыври чи лайăх шкулсене палăртнă тесе пĕлтернĕччĕ. Чи лайăххисен йышне республикăри 9 хулари тата яллă вырăнти 8 пĕлỹ çурчĕ кĕнĕ. Вĕсен йышĕнче Комсомольски 1-мĕш вăтам шкулĕ те пур.
Акă, октябрĕн 15-мĕшĕнче республика Пуçлăхĕ Михаил Игнатьев муниципаллă районсемпе хула округĕсен пуçлăхĕсемпе ирттернĕ канашлура чи лайăххисен шутне кĕнĕ шкулсене 1 миллион тенкĕ преми пама Хушу кăларнине пĕлтернĕ.
Çавăнпа пĕрлех Михаил Васильевич ачасенчен чăн-чăн патриотсем тата пысăк пĕлỹллĕ çынсем тăвассишĕн тăрăшакан директорсене, вĕрентекенсене, вĕренекенсен ашшĕ-амăшне тав тунă.
Чăваш Республикин Вĕренỹпе çамрăксен политикин министрĕ Юрий Исаев республика Пуçлăхне пĕтĕмĕшле пĕлỹ паракан учрежденисене пулăшу кỹнĕшĕн тав тунă, çакă шкулсене лайăххисен шутĕнче çирĕпленсе юлма сăлтав пама пултарнине пĕлтернĕ.
Источник: "Каçал Ен"