14 октября 2016 г.
Пулса çитнĕ çимĕçе вăхăтра пуçтарса илесси - кашни ял çыннин кĕркуннехи тĕп тĕллевĕ. Районти ял хуçалăх предприятийĕсем, фермер хуçалăхĕсем, колхозсем çĕрулмине тата ытти пахча çимĕç культурисене вăхăтра пуçтарассипе тата кĕрхи ĕçсене вĕçлессипе ир пуçласа каçченех тăрăшаççĕ. Хуçалăхсен ĕçченĕсемпе пĕрле ял çыннисем, тĕрлĕ сферăра тăрăшакансем те уй-хирте ĕçлеççĕ. Пурте çанталăк сивĕтиччен тухăçа пуçтарса кĕртесшĕн.
Октябрĕн 13-мĕшĕ тĕлне районти хуçалăхсенче 1124 гектар çĕрулми кăларнă, пỹлмесене 25011 тонна кĕртнĕ. Гектар пуçне вăтамран 222,5 центнер тухăç илеççĕ. Тата 148 гектар çинчен çĕрулми кăлармалли юлнă, ку енĕпе "Восток", "Заря", "Луч", "Победа", "Пайгас" ял хуçалăх кооперативĕсенче тăрăшсах ĕçлеççĕ. "Рассвет" кооперативра "иккĕмĕш çăкăр" уйĕсене октябрĕн 10-мĕшĕнчех пушатнă. Хуçалăхра çĕрулмине ятарлă комбайнпа пуçтарнă, пỹлмесене 115 гектартан 2300 тонна пуçтарса кĕртнĕ. Вăтам тухăç кашни гектартан - 200 центнер.
Ял хуçалăх предприятийĕсенче выльăх-чĕрлĕх апачĕ хатĕрлес енĕпе те çанă тавăрсах ĕçлеççĕ. Хальлĕхе 688 гектар куккурус вырнă, 11809 тонна силос хывнă. Кĕрхи çĕртме ĕçĕсене 12579 гектар çинче пурнăçланă.
А.ЕФРЕМОВА.
Источник: "Каçал Ен"