11 октября 2016 г.
Иртнĕ эрнере районти пушар надзор уйрăмĕн начальникĕ Дмитрий Кузьмин, Комсомольски ял тăрăхĕн пуçлăхĕн çумĕ Олег Абросимов, Пĕтĕм Раççейри ирĕклĕ пушар обществин Канашри уйрăмĕн начальникĕ Юрий Никитин Комсомольскинче пурăнакансем патне çитсе профилактика рейчĕ ирттернĕ.
Профилактика ĕçĕ вăхăтĕнче пушарнăйсем халăхпа йăлари электроприборсемпе усă курнă чухне мĕнле хăрушсăрлăх правилисене пăхăнмаллипе кĕске инструктаж ирттернĕ. ВДПО Канашри уйрăмĕн специалисчĕсем вара кил-çурт хуçисемпе электропроводсен изоляцийĕн хирĕçтăрăвне тĕрĕсленĕ. Асăннă процедура изоляцин пулма пултаракан сиенĕсене вăхăтра тупса палăртма, кĕске замыкани е вут-çулăм тухасран асăрхаттарма май парать.
Ирттернĕ диагностика нумай хуçалăхра электропроводсем йĕркеллине кăтартни уйрăмах савăнтарать. Виçесен пĕтĕмлетĕвĕсем начар пулнă хуçалăхсен хуçисем вара çитес вăхăтрах проводасене йĕркене кĕртме е улăштарма шантарчĕç.
Профилактика рейчĕ вăхăтĕнче ĕçлĕ ушкăн нумай çынпа тĕл пулса калаçнă. Шел пулин те, чылайăшĕ "манăн килте пушар тухмасть" тесе шутлать, хăрушсăрлăх техники ыйтнине пăхăнмасть. Çапах та пушар ăнсăртран сиксе тухакан пулăм мар, çулăм ярса илсен вара никама та хĕрхенсе тăмасть.
Д.КУЗЬМИН,
районти пушар надзор уйрăмĕн начальникĕ.
Источник: "Каçал Ен"