30 сентября 2016 г.
Çак кунсенче Хирти Сĕнтĕр ялĕнче пурăнакан чи хисеплĕ çынсенчен пĕри - Елизавета Якимовна Кустова - 90 çулхи юбилейне паллă турĕ. Сумлă юбилей ячĕпе Раççей Президенчĕ Владимир Путин ветерана салам çырăвĕ янă. Район администрацийĕн пуçлăхĕн çумĕ Светлана Ульдина, Хирти Сĕнтĕр ял тăрăхĕн пуçлăхĕ Геннадий Ефремов хисеплĕ ватăна çуралнă кун ячĕпе саламларĕç, салам открыткипе, парнепе чысларĕç. Президент юбиляра Аслă Отечественнăй вăрçă çулĕсенче, кайран та йывăрлăхсене парăнмасăр ырми-канми тăрăшнăшăн тав тунă. Елизавета Якимовна хăйне манманшăн, хисеп тунăшăн савăннине пытармарĕ.
Вăрçă çулĕсене аса илсессĕн кинемей куççульленмесĕр чăтаймарĕ. Йывăр пулнă, çапах вĕсем çĕнтерĕве çывхартассишĕн ырми-канми тăрăшнă. Лиза аппа торф кăларма та кайнă, окопсем те чавнă. Мĕн тивĕçлĕ канăва кайичченех вырăнти колхозра дояркăра ĕçленĕ. Ĕçри тăрăшулăхшăн ăна Хисеп тата Тав хучĕсемпе, медальсемпе чысланă.
Кинемей çулĕсене пăхмасăрах аван çỹрет, лавккана кайса килет, кил-карти-шĕнче кăштăртатать. Çуллахи вăхăтра пахчара вăхăта ирттерет, унта тĕрлĕ улма-çырла, пахча çимĕç çитĕнтерет. Пушă вăхăтра вара ватă радио тата Вячеслав Христофоров юрăç янратакан юрăсене чун каниччен итлеме кăмăллать. Мĕн çамрăкранах юрра-ташша ăстаскер, паянхи кун та юрăсем шăрантарать.
- Эх, Христофоровăн юррисем çав тери хитре вĕт, чун савăнать, пĕрле юрлас килет,- терĕ Елизавета Якимовна черетлĕ юррă çемми шăплансан.
Ĕмĕрĕнче хĕн-хурне нумай курнă çынна канлĕ ватлăхпа киленме Турри те сывлăх патăрччĕ. А.АНТОНОВА.
Источник: "Каçал Ен"