27 сентября 2016 г.
"Кăçалхи июлĕн 1-мĕшĕпе августăн 15-мĕшĕччен пынă Пĕтĕм Раççейри ял хуçалăх çыравĕнче 3662 пин ял хуçалăх предприятийĕнчен, 174,8 пин фермер хуçалăхĕпе уйрăм предпринимательтен, 18,2 млн уйрăм хуçалăхран тата коммерциллĕ мар 76,3 пин пĕрлешỹрен статистика кăтартăвĕсем пуçтарнă, - пĕлтернĕ Росстат пуçлăхĕ Александр Суринов Мускавра иртнĕ пресс-конференцире.
Федераци службин пуçлăхĕ пĕлтернĕ тăрăх, респондентсем çыравçăсемпе хутшăнса ыйтусем çине лайăх хуравланă, çырава хутшăнас теменнисем сахалăн пулнă.
"Фермер хуçалăхĕсен 0,01 проценчĕ, ял хуçалăхĕпе ĕçлекен уйрăм предпринимательсен 0,04 проценчĕ ыйтусене хуравлама килĕшмен. Уйрăм хуçалăхсенче пурăнакансен 0,2 проценчĕ тата сад-пахча, коммерциллĕ мар пĕрлешỹсен респонденчĕсен 0,03 проценчĕ çырава хирĕç пулнă", - палăртса хăварнă Александр Суринов.
Федераци служби, территорисенчи статистика уйрăмĕсем, влаç органĕсем, район администрацийĕсем, çыравçăсем ла-йăх ĕçленĕрен ял хуçалăх çыравне ăнăçлă вĕçлеме май килнĕ. Кунта, паллах, массăллă информаци хатĕрĕсем халăха кирлĕ информаципе тивĕçтерсе тăнине те палăртса хăвармалла.
- Пĕтĕм Раççейри ял хуçалăх çыравĕн сайчĕн пресс-центрĕ тухăçлă ĕçленĕ, пултарулăх конкурсĕсем, викторинăсем ирттернĕ. Унта Раççейĕн тĕрлĕ кĕтесĕнче пурăнакан пин-пин çын хутшăннă, - аса илтернĕ Александр Суринов.
Çавăн пекех статистика кăтартăвĕсене пухма тата вĕсене тишкерме интернет-технологин аталанăвĕ пысăк витĕм кỹнĕ.
Росстат ял хуçалăх çыравне юлашки тапхăра йĕркелесе ирттернĕ хыççăн пĕтĕмлетет. Çитсе килме йывăр, инçе вырнаçнă районсемпе ялсенче вăл сентябрĕн 15-мĕшĕпе ноябрĕн 15-мĕшĕсенче иртет. Çак вăхăтра 300 ял хуçалăх организацийĕ, 795 фермер хуçалăхĕ тата 25 пин уйрăм хуçалăх пирки информаци пухмалла.
Источник: "Каçал Ен"