27 сентября 2016 г.
Сентябрĕн 27-мĕшĕнче воспитательсем тата шкулчченхи вĕренỹ ĕçченĕсем професси уявне паллă тăваççĕ. Тин çеç пурнăç çулĕпе утма пуçланă тĕпренчĕксене ача садĕнче ăшшăн кĕтсе илеççĕ, тивĕçлĕ воспитани параççĕ. Воспитательсем пуçласа пĕчĕккисене пĕр-пĕринпе килĕштерсе выляма, тĕрлĕ ĕçе пĕрле пурнăçлама хăнăхтараççĕ, конкурссене те явăçтараççĕ. Çак ĕçре ачасене чăннипех те чун-чĕререн юратакан çынсем çеç тăрăшма пултараççĕ. Вĕсенчен пĕри - Комсомольскинчи "Колосок" ача-пăча садĕнче тăрăшакан Наталья Ивановна Сергеева. Вăл юратнă ĕçре 36 çул тимлет.
Шкулта вĕреннĕ чухнех ачасемпе ĕçлеме ĕмĕтленнĕ. Çавăнпах педагог профессине суйласа илнĕ. Лаша пуласси тихаран, çын пуласси ачаран паллă, теççĕ. "Пĕчĕк чухне пуканесемпе шкулла выляттăм та, анне яланах вĕрентекен пулатăнах пулĕ тетчĕ", - ачалăхне тулли кăмăлпа аса илчĕ воспитатель.
Наталья Ивановна кăçал "Çулталăк воспитателĕ" конкурсăн районти тапхăрне хутшăнса иккĕмĕш вырăна çĕнсе илнĕ. Кун йышши конкурса воспитатель пĕрре кăна мар хутшăннă. Чылай тĕрĕслев витĕр тухнă вĕсем, презентаци, ăсталăх сехечĕ, "çавра сĕтел", уçă мероприяти. Пĕр-пĕрин опычĕпе паллашнă. Ахăртнех, малти вырăнсене йышăннă воспитательсен ăста-лăхне жюри членĕсем пысăк хак панă.
"Ача-пăча хушшинче хуйха-суйха, йывăрлăхсене манатăн. Вĕсем вăй-хăват параççĕ, савăнăç парнелеççĕ. Эпир вара пĕчĕкскерсене занятисенче ыррине усаллинчен, хитрелĕхе илемсĕрлĕхрен уйăрма вĕрентетпĕр. Ачасене çутçанталăк черченлĕхĕпе паллаштарни те питĕ пĕлтерĕшлĕ. Кашни самант усăллă ирттĕр, ялан çĕннине пĕлччĕр тесе тăрăшатпăр", - терĕ воспитатель.
Хальхи вăхăтра вăл 4-5 çулсенчи ачасемпе ĕçлет, ушкăнра - 19 шăпăрлан. Наталья Ивановна ертсе пынипе ачасем мероприятисене хастар хутшăнаççĕ. Чылай смотр-конкурсра та ушкăн пĕрре мар мала тухнă, çакна стенана илем кỹрекен Тав хучĕсем çирĕплетеççĕ. Воспитателĕн паха ĕçне те пĕрре кăна мар палăртнă. 2012 çулта Наталья Ивановнăна вĕрентỹ ĕçĕнче тỹрĕ кăмăлпа вăй хунăшăн Чăваш Республикин Вĕренỹпе çамрăксен политикин министерствин Хисеп грамотипе чысланă.
А.ЕФРЕМОВА.
Источник: "Каçал Ен"