23 сентября 2016 г.
Нумаях пулмасть Комсомольски 2-мĕш вăтам шкулĕнче 10-11-мĕш классенче вĕренекенсем Чăваш Республикин Патшалăх Канашĕнче экскурсире пулчĕç. Аппарат ертỹçи Анатолий Ухтияров аслă классенче вĕренекенсене республикăри саккун кăларакан орган историйĕпе тата паянхи ĕçĕ-хĕлĕпе туллин паллаштарчĕ. Вĕренекенсемшĕн пĕлмелли, курмалли нумай пулчĕ. Сăмахран, вĕсем Патшалăх Канашĕн уйрăмлăхĕпе, депутатсем мĕнле ĕç пурнăçланипе кăсăкланчĕç, ыйтусем пачĕç. Вĕренекенсем хăйсене Чăваш Республикин представительлĕ органĕн членĕсем пек туйса илме, парламентарисен ĕç вырăнĕсене курса хаклама пултарни пушшех те асра юлать. Экскурсире кашни ача регионри парламент представителĕн парнине тивĕçме пултарни те паха. Тен, вĕсенчен хăшĕ-пĕри пурнăçне шăпах ЧР Патшалăх Канашĕпе çыхăнтарĕ. Çутă пуласлăх - çамрăксенче. Л.АБРАМОВА, вĕрентекен.
Источник: "Каçал Ен"