23 сентября 2016 г.
Сентябрĕн 18-мĕшĕнче Пĕрлехи сасăлав кунĕ иртрĕ. Чăваш Республикин Патшалăх Канашĕн депутачĕсене суйланă чухне Комсомольски округĕпе (виçĕ район кĕрет: Комсомольски, Елчĕк, Канаш районĕн пĕр пайĕ) Юрий Алексеевич Поповшăн чи нумай сасă панă - 23898 çын. Александр Михайлович Васильевшăн - 4441 çын, Николай Аркадьевич Кашириншăн - 2015 çын, Елена Николаевна Судяковашăн - 762, Валерян Никандрович Тепловшăн 2322 çын сасăланă. Партисемпе илес пулсан чи нумай сасă "Единая Россия" партишĕн панă. Ун хыççăн КПРФ, ЛДПР, "Справедливая Россия" тата ыттисем те тăраççĕ. Районти малтанхи кăтартусем вара çапларах: РФ Патшалăх Думин депутачĕ пулма ытларах Александр Петрович Капитоновшăн (8883 çын - 59,99 процент) сасă панă, Анатолий Геннадьевич Аксаковшăн - 2255 çын (15,23 процент). Ыттисен вара - 0,61 процентран пуçласа 7,93 процент таран. Раççей Федерацийĕн Патшалăх Думин суйлавне хутшăннă 14 парти хушшинче районта пурăнакансем "Единая Россия" партишĕн ытларах сасă панă - 9693 çын (65,37 процент). Ун хыççăн КПРФ пырать - вăл 1749 сасă пухнă, суйлавçăсен 11,79 проценчĕ асăннă парти çĕршыв парламентĕнче пултăр тесе сасăланă. 952 сасăпа ЛДПР - виççĕмĕш вырăнта (6,42 процент). "Справедливая Россия" партине 680 çын суйланă (4,59 процент), ытти партисемшĕн вара тата сахалрах сасăланă. Кăçалхи суйлавра пирĕн районти Элпуç, Шурут тата Тукай ял тăрăхĕсем Патăрьел 2-мĕш суйлав округĕн йышĕнче пулчĕç (асăннă округа виçĕ район кĕрет: Патăрьел, Комсомольски, Шăмăршă). Унти пĕр мандатлă округран Чăваш Республикин Патшалăх Канашĕн депутачĕ пулма тăратнă кандидатсенчен чи нумай сасă Олег Вадимович Мешков пуçтарнă - 26742 сасă. Партисенчен вара "Единая Россияшăн" 25882 çын, КПРФшăн 4722 сасăланă. ЛДПР - 2321, "Справедливая Россия" 1328 сасă пухайнă, ыттисен вара сахалрах. Л.ШУРЯШКИНА.
Источник: "Каçал Ен"