23 сентября 2016 г.
Ачасене сывă пурнăç йĕркине хăнăхтарса ỹстересси, вĕсене спортпа туслаштарасси - аслисен тивĕçĕ. "Кĕтне" ФСК-ра ачасен ỹт-пĕвне пиçĕхтерме пĕтĕм услови пур. Кунта тĕрлĕ секцисем ĕçлеççĕ. Вĕренекенсем футболла, баскетболла, волейболла выляççĕ, шывра хăвăрт ишме хăнăхаçççĕ, кире пуканĕ йăтаççĕ. Çак кунсенче вара физкультурăпа спорт комплек-сĕнче пысăк ăмăрту иртрĕ. Патăрьел, Комсомольски районĕсен, Шупашкар хулин, Тутарстан республикин спортсменĕсем дуатлон вăййинче икĕ хутчен Европа чемпионĕ пулнă Сергей Яковлевăн парнисене çĕнсе илессишĕн чупса тата бассейнра ишсе ăмăртрĕç. Кунта уйрăмах пирĕн районăн ăста спортсменĕсен çитĕнĕвĕсене палăртса хăварас килет. 2003-2004 çулхисен хушшинче Полина Хораськина, Елена Краснова, Кирилл Денисов чи маттуррисем пулчĕç. 13-14 çулхисенчен Ольга Соловьева финиша 1-мĕш, Мария Семенова виççĕмĕш çитрĕç. Каччăсем хушшинче Максим Самаркинпа Петр Козлов иккĕмĕшпе виççĕмĕш вырăнсене тухрĕç. Çĕнтерỹçĕсене тĕнче спорт мастерĕ Сергей Валерьянович Яковлев Хисеп грамотисемпе, медальсемпе, парнесемпе чысларĕ. В.ГАВРИЛОВ.
Источник: "Каçал Ен"