20 сентября 2016 г.
Юлашки вăхăтра карас çыхăнăвĕн хатĕрĕсемпе тата Интернет сечĕпе усă курса тунă преступленисен шучĕ кашни кун ỹсет. Çынсене улталаççĕ, укçа-тенкĕсĕр хăвараççĕ. Ытларах чухне киревсĕр тĕллевлĕ çынсем тĕрлĕ сайтри пĕлтерỹсем тăрăх таваршăн укçа куçарса паратпăр тесе çынсен банк карточкисен реквизичĕсене пĕлеççĕ те - банкри шут çинчи укçана сăптăрса илеççĕ. Преступниксем пластик карточкăсем çинчи укçана парольсĕрех вăрлама та вĕренсе çитнĕ. Унпа пĕрлех çывăх çыннăр инкеке лекнĕ, ăна пулăшма ыйтса укçа-тенкĕ куçарса пама ыйтнă тĕслĕхсем те пĕрре кăна мар пулнă. Пĕр-пĕр вăйăра çĕнтернĕ е тата пысăк укçа-тенкĕ выляса илнĕ тесе пĕлтерекен СМС-хыпарсем те телефонсем çине килеççĕ. Чылайăшĕ савăнса çыру çыракансем мĕн ыйтнине тăвать те ултав серепине лекет. Çавăнпа та асăрхануллă пуласчĕ. СМС-хыпарсене ан хуравлăр, çывăх çыннăр патне шăнкăравласа сывлăхĕпе кăсăкланăр, банк карттин реквизичĕсене никама та ан пĕлтерĕр! Ултавçăсем тем тĕрлĕ майпа та усă курнă пирки нумайăшĕ пĕлет - кун пирки хаçатсем те çине-çинех çыраççĕ, телекурав асăрхаттарать. Анчах çынсем шăнман пăр çине çав-çавах ларса юлаççĕ. Акă, сентябрĕн 13-мĕшĕнче çеç Улатăр хулинче пурăнакан 59-ти хĕрарăм телефонĕ çине "Ваша карта заблокирована" тесе СМС-хыпар килнĕ. Хĕрарăм СМС-ра кăтартнă телефон номерĕпе шăнкăравланă, ултавçăсем мĕн тума хушнине веçех пурнăçланă та, карттă çинчи 9 пин тенкĕсĕр тăрса та юлнă. Шупашкар хулинче пурăнакан 60-ти хĕрарăм та ултавçăсен серепине лекнĕ. Унăн банк картти çинчен 3300 тенкĕ çухалнă. Граждансене тимлĕрех пулма, телефонпа е ытти майпа илекен информацие тĕрĕслеме сĕнетпĕр, лайăх палламан çынсене шанма юраманни пирки тепĕр хут аса илтеретпĕр. Иккĕленỹ çуратакан мĕнпур тĕслĕхре çийĕнчех полиципе çыхăнма ан ỹркенĕр. Ахаль телефонпа - 02, кĕсье телефонĕпе 020 е 102 номерсемпе шăнкăравламалла. Г.КОКШИН, районти шалти ĕçсен пайĕн начальникĕ.
Источник: "Каçал Ен"