20 сентября 2016 г.
Сентябрĕн 16-мĕшĕнче районти культура ĕçченĕсем пултарулăх сезонне уçрĕç. Кашни ял клубĕнче тĕрлĕ концертсем, выставкăсем иртнĕ. Тĕслĕхрен, районти культура çуртĕнче куракансене вырăнти артистсем "Улькка кинĕн виçĕ кинĕ" спектакльпе савăнтарнă. Кĕçĕн Çĕрпỹел культура çуртĕнче "Юрлар-и юррине, ташлар-и ташшине" концерт иртнĕ. Хирти Мăнтăрти культура ĕçченĕсем "Пултарулăх çавра çилĕ" программа хатĕрленĕ. Хырхĕрринче "Эпир каллех сцена çинче" концерт программине куракансем пысăк хак панă. Элпуç ял тăрăхĕнче пурăнакансене "Кавăн PARTI" шоупа тĕлĕнтернĕ. Асанкассисем пултарулăх сезонне ача-пăча концерчĕпе уçнă. Нĕркеçре "Пĕтĕмпех сире валли" уяв программипе сезона старт панă. Пур ял тăрăхĕнче те пултарулăх сезонне савăнăçлă ларура уçса чун каниччен савăннă. Унсăр пуçне ял çыннисем алă ăстисен ĕçĕсемпе, тĕрлĕ выставкăсемпе киленнĕ. Вĕсене Ĕç çыннин çулталăкне халалланă. - Пултарулăх сезонне кашни ял тăрăхĕнчех уçни чăн-чăн уяв пулса тăчĕ. Культура ĕçченĕсем каннă хыççăн çĕнĕ вăй-хăватпа малашне тата та тĕрлĕ, интереслĕ мероприятисемпе савăнтараççех. Пирĕн тĕллев - куракансен кăмăлне тивĕçтересси, - пĕлтерчĕ районти централизациленĕ клуб системин директорĕ Мария Илларионова. (ХАМĂР ИНФ.).
Источник: "Каçал Ен"