16 сентября 2016 г.
Çĕрулмине "иккĕмĕш çăкăр" тесе ахальтен каламан. Унран эпир темĕн тĕрлĕ апат-çимĕç хатĕрлетпĕр. Вăл чăннипех те паха апат. Нумаях пурмасть районти тĕп библиотекăра çĕрулмине мухтаса пысăк уяв иртрĕ. Ăна Ĕç çыннин çулталăкне халалларĕç.
Тĕп библиотекăн тата ялсенчи вулавăшсен ĕçченĕсем çĕрулми праçникне тĕплĕн хатĕрленни куç кĕрет. Тĕрлĕ апат-çимĕç янтăланă, сăнỹкерчĕксен выставкипе кашниех кăсăкланса паллашрĕ. Çав вăхăтрах вĕсем чи тутлă апат-çимĕçшĕн, сăнỹкерчĕкшĕн, япалашăн сасăларĕç. "Çĕрулмине мухтав" агрофирма çитĕнтерекен чи паха вăрлăхсен выставкипе те куракансем интересленсех паллашрĕç.
Ача-пăча библиотекинче "Çĕрулмине мухтар" викторина-конкурс иртрĕ. Комсомольски 1-мĕш вăтам шкулĕн 4 "б" класĕнче пĕлỹ пухакансем тата библиотекарьсем унта хастар хутшăнчĕç. Вĕренекенсем тупмалли юмахсене шĕкĕлчерĕç, сценка лартрĕç, конкурссемпе ăмăртусенче вăй виçрĕç.
Юлашкинчен вара конкурс çĕнтерỹçисене палăртрĕç. Сăнỹкерчĕксен конкурсĕнче Любовь Филиппова ĕçĕ чи лайăххи пулчĕ. Роза Розова - иккĕмĕш, Татьяна Козлова виççĕмĕш вырăнсене йышăнчĕç. Апат-çимĕç хатĕрлекенсенчен чи маттурри - Любовь Филиппова. Надежда Козлова тата Роза Розова çĕрулмирен янтăланă апатсем чи тутлисем тесе палăртрĕç. "Улыбка природы" конкурсра ача-пăча библиотекин ĕçченĕсен ĕçĕ чи лайăххи тесе йышăнчĕç. Роза Розова тата Йолдыз Шайдуллина ĕçĕсене те куракансем ытларах хапăлланă.
А.ЕФРЕМОВА.
Источник: "Каçал Ен"