09 сентября 2016 г.
Ыйтăмсен пĕтĕмлетĕвĕпе республикăра пурăнакансенчен чылайăшĕ "Единая Россия" партине кăмăллаççĕ.
Суйлавччен пĕр эрне ытларах çеç юлчĕ. Социологсем хăйсен эксперт хаклавĕпе паллаштараççĕ тата çĕршыври паллă политика пулăмне прогнозлаççĕ. Эрне пуçламăшĕнче "Левада-Центр" çĕршывĕпех йĕркеленĕ тĕпчев пĕтĕмлетĕвĕсене пичетленĕ. Раççейре пурăнакан 1600 çын хăйсен политика шухăш-кăмăлне пĕлтернĕ. Малтанхи пекех, Раççей çыннисемшĕн "Единая Россия" парти шанăçра. Асăннă партишĕн ыйтăма хутшăннисен 50 : сасăлама хатĕр. Ун хыççăн КПРФ, ЛДПР тата Справедливая Россия пыраççĕ.
Чăваш Енре вара политика вăйĕсем урăхларах вырăн йышăннă. Августăн 20-30-мĕшĕсенче "Социс" организаци социологĕсем Чăваш Республикин Патшалăх Канашĕн суйлавне халалласа ыйтăм йĕркеленĕ. Унта 7700 çын хутшăннă. "Енчен те паян Чăваш Республикин Патшалăх Канашне депутатсене суйламалли кун пулнă пулсассăн, эсир хăш партишĕн сасăланă пулăттăр?" - ыйтнă респондентсенчен.
Вĕсенчен 55 проценчĕ "Единая Россия" партишĕн сасăласшăн. Иккĕмĕш вырăнта - "Справедливая Россия", унтан коммунистсем, кайран ЛДПР. Респондентсен 16 проценчĕ камшăн сасăлассине пĕлтермен.
- "Единая Россия" лидер пулнинчен тĕлĕнме кирлĕ мар, - каласа парать социологсен республикăри "Социс" обществăлла организацин директорĕ Дмитрий Борцов. - Чи малтанах çакă Владимир Путинăн пысăк авторитечĕпе çыхăннă. Унпа пĕрлех партие шанни çĕршыври тăнăçлăхпа, лайăх улшăнусемпе тỹрремĕнех çыхăннă.
Специалистсем пĕлтернĕ тăрăх, ыйтăм пĕтĕмлетĕвĕсем юлашки мар. Дмитрий Борцов каланă тăрăх, суйлав кампанийĕ активлă фазăра, хăш-пĕр цифра улшăнма та пултарĕ, анчах та "Единая Россиян" лидер позицийĕ улшăнмасть.
Источник: "Каçал Ен"