06 сентября 2016 г.
Республикăра, районта кашни çулах кĕркунне "Кĕр парнисем" курав йĕркелесси йăлана кĕнĕ. Çак пулăма районта пурăнакансем те чăтăмсăррăн кĕтеççĕ. Кăçалхи ярмăрккана сентябрĕн 1-мĕшĕнче ирттерчĕç. Суту-илỹ тума район центрĕнчен çеç мар, тĕрлĕ ялсенчен килсе çитнĕ.
Илемлĕ палаткăсенче улма-çырла, пахча çимĕç, çăкăр-кукăль, чечексем... Туянакан кăмăлне тивĕçтерекен пур тавар та сутлăхра пур. Хĕле валли варени-компот е помидор-хăяр хатĕрлекенсем хупăсем тата йăлара кирлĕ тĕрлĕ тавар туянчĕç. Ярмăрккана килнисем аграрисем лартса çитĕнтернĕ продукцин пысăк ассортиментне - сухана, çĕрулмие, купăстана, панулмие пахаларĕç.
Курава уçнă çĕре район администрацийĕн пуçлăхĕ Алексей Самаркин, Чăваш Республикин Патшалăх Канашĕн Председателĕ Юрий Попов, ЧР Патшалăх Канашĕн депутачĕ Петр Краснов, райпо председателĕ Евгений Карпеев хутшăнчĕç. Вĕсем пухăннисене пысăк уявпа саламларĕç. Комсомольски райповĕ республикăра çеç мар, Раççейре те потребсоюзсем хушшинче малти вырăнсенче пулнине палăртса хăварчĕç, райпона тата аграрисене малалла аталанма сунчĕç, халăха ял хуçалăх продукцийĕ йỹнĕрех сутăннă вăхăтра туянса ĕлкĕрме сĕнчĕç. Чăннипех те пысăк уяв пулчĕ. Çынсем куравпа паллашрĕç, сумккисене туллиех тултарчĕç, концерт курса савăнчĕç, лотерея вылявне те хутшăнчĕç. Парнесем куракансене те, туянакансене те савăнтарчĕç.
- Кĕр карçинкки чăннипех те пуян. Паянхи ярмăрккара çĕрулми, сухан, хăяр-помидор, ыхра, улма-çырла тата ытти тавар туянма май пур. Хакĕсем те "çыртмаççĕ", - пĕлтерчĕ Мария Волкова. Çав кунах спорта кăмăллакансем "Кĕтне" ФСК стадионĕнче тĕрлĕ вăйăсене хутшăнма пултарчĕç. Унта спорт ветеранĕсемпе райпо ĕçченĕсем çуран чупса, тăршшĕне сиксе, дартсра мала тухассишĕн тупăшрĕç. Райпо ертỹçи Евгений Карпеев пуçтарăннă спортсменсене сывă пурнăç йĕркине тытса пынăшăн тав турĕ. Мала тухнисем Хисеп грамотисене тата райпо парнисене тивĕçрĕç.
А.Ефремова.
Источник: "Каçал Ен"