23 августа 2016 г.
Юр ирĕлсе çĕр типнĕ хыççăн ялти механизаторсен пĕр канăç та çук: çур- акине кĕске вăхăтра та пахалăхлă ирттермелле, тымарçимĕçсене акмалла-лартмалла. Çу кунĕсенче вара çуркунне Çĕр-анне аллине панă, тикĕс те ăнăçлă шăтнă тĕштырă, ытти культурăсен лаптăкĕсене пăхса-кăпкалатса тăмалла. Сиенлĕ хурт-кăпшанкăна тĕрлĕ им-çампа сапма та вĕсенех шанаççĕ.
Хăй йĕркипе, утă уйăхĕн вĕçĕнче вырма пуçланать. Çак вăхăта механизаторсем уйрăмах кăмăллаççĕ, ара, çу каçа тар тăкса ỹстернĕ тухăçа алла илмелли самант çитет-çке. "Луч" ял хуçалăх производство кооперативĕнче кăçал 690 гектар çинче пĕрчĕллĕ тата пăрçа йышши тĕштырă çитĕнтернĕ. Кунта вырмана икĕ комбайн хутшăннă. Анатолий Егоровшăн ку сезон тăххăрмĕш е вуннăмĕш ĕнтĕ. Ытти чухне вăл хуçалăхра тракторпа çỹрет, тĕрлĕ ĕç пурнăçлать. Александр Туйдуков комбайнер вара "уй карапĕн" штурвалĕ умне кăçал çеç ларнă. Ачаранах техникăна юратса ỹснĕскер, халиччен вăл хăйĕн тракторĕпе ĕçленĕ, комбайнпа ĕçлеме сĕнсен ăна та çăмăллăнах алла илнĕ. Александра çамрăк каччă Володя Петров пулăшнă. "Çуллахи кун хĕле тăрантарать" текен каларăша шута илсе вăй хунă Анат Тимĕрчкассисем.
"Палессе" тата "Енисей" комбайнсен экипажĕсем тăрăшуллă ĕçлесе ĕнер вырма ĕçĕсене вĕçленĕ. "Луч" кооператив ертỹçи Николай Иванов пĕлтернĕ тăрăх, çитес кунсенчех хуçалăхра кĕрхи культурăсене акма тухасшăн. Халичченхи пекех, вĕсем 250 гектартан кая мар лаптăка йышăнĕç. Çĕрне, вăрлăхне хатĕрленĕ ĕнтĕ. Çĕр ĕçченĕсене çитес çулхи тухăçăн никĕсне хывнă çĕрте ăнăçу сунас килет.
Л.ШУРЯШКИНА.
Источник: "Каçал Ен"