16 августа 2016 г.
Августăн 27-мĕшĕнче Раççейре Кино çулталăкĕ, Кино кунĕ тесе пĕлтернипе çĕршывра "Кино каçĕ" акци старт илет. Ун çинчен Чăваш Енре акци ирттерессипе йĕркеленĕ ушкăнăн ертỹçинчен, культура, национальноçсен тата архив ĕçĕсен министрĕн çумĕнчен Т.В.Казаковăран каласа пама ыйтрăмăр.
- Татьяна Васильевна, каласа парăр-ха, "Кино каçĕ" ирттерессин тĕллевĕсем мĕнле тата акцие кам йĕркелет?
- Раççей пĕлтерĕшлĕ акци пĕрремĕш хут иртет. Унăн тĕп тĕллевĕ - халăха кино курма явăçтарасси. "Музей каçĕ", "Искусство каçĕ" акцисем ăнăçлă иртнипе хавхаланса Раççей Федерацийĕн Культура министерстви "Кино каçĕ" ирттерме шутланă. Пĕлтерĕшлĕ çак меро-приятисене ирттерме Раççей Федерацийĕн пур регионĕсенчи ĕç тăвакан влаç органĕсем, çав шутра Чăваш Ен те, хутшăнаççĕ.
- Чăваш Енре пурăнакансене "Кино каçĕнче" мĕн кĕтет тата каçхи сеанссене ăçта кайма пулать?
- "Кино каçĕ" пирĕн республикăра массăллă акци пулмалла. Çынсем ятарлă вырăнсенче çеç мар, уçă площадкăсенче те кино курма пултараççĕ. Республикăри хуласемпе районсенче кино курма 130 площадка ĕçлемелле.
- Татьяна Васильевна, мероприятин программи мĕнле тата куракансене мĕнле фильмсем кăтартаççĕ?
- Пĕтĕм Раççейре иртекен пĕрремĕш акци пĕлтерĕшлĕ тата курăмлă иртмелле. Программăра хамăр çĕршывра кăларнă фильмсемпе паллаштарни, тĕрлĕ выставкăсем, вăйăсем, квестсем, кинона халалланă конкурссем тата викторинăсем пулмалла. Çĕршыври киноплощадкăсенче 20 сехетре пĕр харăсах укçасăр кино кăтартма пуçлаççĕ. Раççейри тата Чăваш Енри куракансем Кино фончĕ тăратнă Николай Лебедевăн "Легенда № 17", Дмитрий Месхиевăн "Батальон" фильмсене тата Денис Черновăн "Смешарики. Легенда о золотом драконе" анимаци лентине курĕç. Куракансем çак фильмсене сайтра сасăласа хăйсем суйласа илнĕ. Андриян Николаев ячĕллĕ ача-пăча паркĕнче Шупашкар кураканĕсене 2D форматлă "Дети против волшебников" пĕрремĕш хут кăтартакан анимаци фильмĕ кĕтет.
- Наци кино енĕпе мĕнле? Чăваш кураканĕсем наци видеостудийĕн ĕçĕсене курĕç-и?
- Пĕтĕм Раççейри акци иртнĕ вăхăтра каçхи сеанссене çỹрекенсем вырăнти режиссерсем хатĕрленĕ фильмсене те курĕç. Репертуара Марат Никитинăн "Хорло", Маргарита Евтушевскаян "Чувашские амазонки", Владимир Галошевăн "Чăваш тĕнчи", Вячеслав Ориновăн "Çĕнĕ шăпăр çĕнĕлле шăлать", Юрий Сергеевăн "История великого народа" ĕçĕсене кĕртнĕ.
- Татьяна Васильевна, Сирĕн шутăрпа, пĕрремĕш хут иртекен "Кино каçĕн" малашлăхĕ епле пулĕ?
- "Музей каçĕ", "Искусство каçĕ" акцисем ăнăçлă иртнĕ. "Кино каçне" те малашлăхра ăнăçлăх кĕтессе шанатпăр. Кино куракансем хамăр çĕршывра туса кăларнă фильмсене Раççей Кино çулталăкĕнче çеç мар, малашне те пĕрре кăна мар пăхма пултарĕç, вăхăта усăллă ирттерĕç.
Августăн 27-мĕшĕнче республикăра пурăнакансене Пĕтĕм Раççейри "Кино каçĕ" пĕрремĕш акцие хутшăнма, уяв мероприятийĕсемпе киносеанссене тỹлевсĕр курма чĕнетпĕр. Кино каçне хăвăра килĕшекен площадкăсенче ирттерĕр.
Сăмах май, Комсомольскисем те кинона анлă экран çинче курĕç. Кино сеансĕ Комсомольскинчи, Александровкăри, Аслă Чурачăкри, Нĕркеçри, Çĕнĕ Мăратри, Урмаелĕнчи культура çурчĕсенче августăн 27-мĕшĕнче иртĕ. Акци тĕрлĕ куравсемпе уçăлĕ. Ачасем валли 16 сехетре "Смешарики. Легенда о золотом драконе" (6+) мультфильм кăтартĕç. Каçхи кинона кăмăллакансем вара 19 сехетре "Легенда №17" (12+) фильма курĕç. Хĕрарăмсен батальонĕн паттăрлăхĕ пирки пыракан "Батальон" (12_) фильм 21 сехетре пуçланать. Кинона тỹлевсĕрех кĕртĕç. "Кино каçĕ" акцие Комсомольскинчи культурăпа кану паркĕнче каçхине ултă сехетре уçаççĕ. Ун хыççăн кинофильмсенчи юрăсенчен йĕркеленĕ концерт пулать.
Источник: "Каçал Ен"