12 августа 2016 г.
Юнкун, августăн 10-мĕшĕнче, Шупашкар хула пуçлăхĕ Леонид Черкесов тата РФ Патшалăх Думин депутачĕ Алена Аршинова Шупашкарти Гладков урамĕнче тăвакан 1100 вырăнлă шкулăн ĕç-хĕлĕпе паллашрĕç.
Вĕренỹ заведенине васкавлă тăваççĕ, çакна валли хушма стимул пур. Объекта çулталăк вĕçлениччен хута ярсан федераци бюджетĕнчен малалла шкулсем тума тата 500 млн тенкĕ уйăраççĕ. Çавăнпа та ĕçе тĕрĕс йĕркелесе пырасси, палăртнă вăхăта ĕлкĕртесси, 9 уйăхра 700 миллион тенкĕпе усă курасси - хула ертỹçисен тĕп тĕллевĕ. Укçа пулсан ытти хăех пулать пек туйăнать, анчах апла мар иккен. Укçапа тухăçлă усă курасси - ертỹçĕсен ĕçĕн чи пĕлтерĕшлĕ кăтартăвĕ. Федераци центрĕ социаллă программăсем валли субсиди уйăрнă чухне шăпах çакна тĕпе хурать. Чăваш Ен ку тĕлĕшпе лайăх енчен палăрать.
Объектра Чăваш Республикинче хатĕрленĕ строительство материалĕсемпе çеç усă кураççĕ. Пиншер çын унта вăй хурса вырăнти бюджета налук кĕртет.
Леонид Черкесов ĕç çине хула пуçлăхĕ пек çеç пăхмасть. Çĕнĕ шкулсен строительство программи республикăнах пырса тивет. Шупашкар строителĕсен ырă ĕçне районсенче те усă кураççех. Алена Аршинова депутатшăн çакă "профиль" теми. Вăл - думăра вĕрентỹ комитечĕн председателĕн çумĕ. Темиçе çул ача сачĕсен строительствипе ĕçлерĕ. Халĕ çĕнĕ шкулсем тăвассине малалла илсе пырасшăн.
Объектра графикран кăштах юлни курăнать. Апла пулин те строительсем те, Леонид Черкесов та ăна йĕркелесе ярасса шанаççĕ. Ыйту - ĕçе йĕркелессинче. Ку тĕлĕшпе вара опыт çителĕклĕ. Çулталăк вĕçленнĕ тĕлне хула çĕнĕ шкуллă пулĕ.
Алена АРШИНОВА:
Ку вăл хулашăн пысăк парне вырăннех пулĕ. Чылай шкул çурчĕсем кивелеççĕ, япăхаççĕ. Ку вара паянхи мĕнпур ыйтăва тивĕçтерекен шкул пулĕ. Кунта бассейн, икĕ спорт залĕ тума палăртнă. Хăтлă шкулта ачасене вĕренме кăмăллă пулĕ тесе шутлатăп. Малашне икĕ-виçĕ сменăпа вĕренессине пĕтермелле, ачасене вĕренмелли мĕнпур условисем туса памалла. Чăваш Енре юлашки вунă çулта вăтăра яхăн çакнашкал шкул туса хута ямалла.
Источник: "Каçал Ен"