12 августа 2016 г.
Районта пурăнакансене спорта явăçтарас тĕлĕшпе чылай ĕç тăватпăр. Халиччен пирĕн тăрăхра анлă сарăлман спорт енĕсем те вăй илсе пыраççĕ. Баскетбол, хоккей, алă вăйĕ виçесси, алă вăйĕпе çапăçасси, шывра вăхăтпа ишесси... Юлашки çулсенче ватти те, вĕтти те стадионсем енне туртăнни вара уйрăмах савăнтарать.
Районта 2011 çулта "Кĕтне" физкультурăпа спорт комплексĕ хăйĕн алăкне уçрĕ. Кунта çỹлерех асăннă секцисемсĕр пуçне çăмăл атлетикăпа, ирĕклĕ кĕрешỹпе, волейболпа, футболпа, каратэпе тренировкăсем иртеççĕ. 2015 - 2016 çулсенче кунта 18 ушкăнра 392 çын (çăмăл атлетика - 42, ирĕклĕ кĕрешỹ - 88, волейбол - 108, баскетбол - 54, футбол - 60, алă вăйĕ виçесси тата каратэ - 20-шер) тренировкăна çỹренĕ. 2015 çулта ДЮСШ тренерĕсем 1-мĕш разрядлă 6 спортсмена вĕрентсе кăларнă, 374 çын массăллă разряда илме тивĕç пулнă. Кăçал вара, çулталăк пуçланнăранпа, Рестем Ильясов спорт мастерĕн кандидачĕ пулса тăнă, 13-ĕн - 1-мĕш разрядлă (ирĕклĕ кĕрешỹ - 7, алă вăйĕ виçессипе - 6). Кану кунĕсенче, каникулсенче 25 метрлă бассейна шыва кĕрсе киленме кăмăллакансен шучĕ те ỹсрĕ. Унсăр пуçне ирĕклĕ кĕрешĕвĕн республикăн пĕрлештернĕ командине пирĕн районтан 2 кан- дидат - Станислав Григорьевпа Рая Школьникова - кĕнĕ. Олимп резервĕн училищинче вĕренекенсем те пур, вĕсем: Катерина Кадыкова, Антон Лукиянов.
Эпир тĕрлĕ ăмăртусене нумайрах çỹреме пуçларăмăр. ФСКра ирттерекен ăмăртусем те пахалăхлăрах та тĕрлĕ енлĕрех. Кăçал физкультурăпа спорт комплексĕнче республикăри зонăри 20 ăмăрту иртнине палăртса хăвармалла. Районтисене шута илес пулсан ку цифра 70пе танлашнă.
Вăтам тата пĕтĕмĕшле пĕлỹ паракан шкулсенче вĕренекенсем хушшинче çулсеренех спартакиада иртет. Ачасем çулталăк тăршшĕпе районти тĕрлĕ спорт ăмăртăвĕсене хутшăнаççĕ. Акă, кăçал спортсменсем спортăн 11 енĕпе тупăшрĕç. Кăтартусене пĕтĕмлетнĕ хыççăн вăтам шкулсем хушшинче Комсомольски 1-мĕш вăтам шкулĕн спортсменĕсем чи маттуррисем пулчĕç. Иккĕмĕш вырăна пĕр пек очко пухса Комсомольски 2-мĕш тата Аслă Чурачăк вăтам шкулĕсем пайларĕç. Спартакиадăра тĕп шкулсем хушшинче Хирти Явăшсене çитекен пулмарĕ. Александровка тата Хырхĕрри тĕп шкулĕсен вĕренекенĕсем иккĕмĕшпе виççĕмĕш вырăнсене тивĕçрĕç.
Районта çеç мар, республикăри спартакиадăра та пирĕн шкул ачисем япăх мар ăмăртаççĕ. Кăçал çеç 13 спортсмен спортăн тĕрлĕ енĕпе çĕнтерỹçĕ ятне çĕнсе илчĕ, 33-шĕ малти вырăнсен призерĕсем пулса тăнă. Ирĕклĕ кĕрешỹре, çăмăл атлетикăра тата алă вăйĕ виçессинче пирĕн спортсменсем - чи маттуррисем. Комсомольски районĕн волейболпа баскетбол командисем те çулсеренех малтисен йышĕнче. Кăçал пирĕн спортсменсем Чăваш Республикин Пуçлăхĕн Кубокне çĕнсе илессинче те пĕлтĕрхинчен лайăхрах кăтартупа палăрчĕç. Тепĕр çул рейтингра тата та çỹлерех хăпарасса шанас килет. Шел пулин те, йĕлтĕрпе чупасси тата хоккей уксахлать.
Ачасене спорта юратма хăнăхтарас, вăй-халне çирĕплетме пулăшас тĕлĕшпе шкулсенчи физкультура учителĕсем тăрăшуллă пулнине палăртмалла. Нĕркеçри О.А.Кошкина, Хырай Ĕнелти В.Ф.Волков, Хирти Явăшри А.К.Давыдов, Шурутри П.Е. Козлов, Александровкăри Т.И. Волкова, Комсомольски 1-мĕш вăтам шкулĕнчи А.Ф.Мамуткин, Хырхĕрринчи А.В.Гаврилов, Çĕнĕ Мăратри Е.Г.Басников, Тукай Мишерти Н.С.Зарипов тата ыттисем те Физкультурниксен кунĕ умĕн ырă сăмаха тивĕçлĕ. Вĕсемсĕр пуçне С.В.Остапиенко (баскетбол), Р.Ф.Абдуллин (футбол), Г.Н.Петухов (ирĕклĕ кĕрешỹ), В.Х.Денисов (ирĕклĕ кĕрешỹ), В.И.Плешков (çăмăл атлетика), Н.С.Сахров (алă вăйĕ виçесси), А.А.Тихонов (волейбол) тренерсен районти спорт аталанăвĕнче витĕмĕ пысăк. Физруксем те, тренерсем те чăннипех те хăйсене шаннă ĕçе тỹрĕ кăмăлпа пурнăçлаççĕ. Çакна вĕсем пĕлỹ паракан ачасен ăмăртусенчи çитĕнĕвĕ те туллин çирĕплетет.
Физкультурăпа ĕçлекен кадрсем çителĕксĕр пулин те, пирĕн район республикăра спортра палăрса тăрать. Ăмăртусенче хамăра лайăх енчен кăтартатпăр. Çитес çул "Кĕтне" ФСК тренерсен штатне 3 çынран 5-7 таран ỹстересшĕн. ДЮСШна çỹреме те çамрăксене нумайрах явăçтарасшăн. Республикăри ăмăртусенче кирлĕ шая хăпарайманни пĕтĕмпех ятарлă программăсем çуккинчен килет. Çавăнпа та тепĕр çул эпир хамăр ума йĕлтĕрпе чупассине, ишессине тата хоккейла выляссине вĕрентессипе лицензи илме тĕллев лартнă. Тĕллевсем паллă, вĕсене пурнăçа кĕртесси çеç юлать.
Ыран - Физкультурниксен кунĕ. Çак ятпа районта пурăнакан спорта юратакансене, ырă юхăма саракансене чун-чĕререн саламлатăп, малашне çĕнĕ çитĕнỹсем сунатăп.
В.ГАВРИЛОВ,
аслă методист.
Источник: "Каçал Ен"