05 августа 2016 г.
Пирĕн ялти асăну комплексĕ çулсерен илемленсе, пуянланса пырать. Аслă Отечествăлла вăрçăра пуçĕсене хунисене, çĕнтерỹпе таврăннисене халалланă стенд та мрамортан. Кĕрсе тухмалли сукмака çĕнетме те палăртнă. Ку ĕçсене тума чăн-чăн ырă чунлă, ылтăн алăллă çынсем тăрăшнă.
2014 çулта пирĕн ентеш Валери Туркай, "Искра" колхоз председателĕ Александр Зайцев пуçарнипе часовня тума шут тытнă. Вăхăт нумай та иртмерĕ, ял çыннисем, спонсорсем пысăк витĕм кỹнипе, часовньăна хăпартма та пикеннĕ. Çак чăнахах та сăваплă ĕçе пĕтĕм ял халăхĕ хутшăннăччĕ, вĕсем тỹлевсĕрех ирĕн-каçăн тăрăшрĕç.
Часовньăна уçнă хыççăн ăна çĕклеме пулăшнисене вăхăтра чыслаймарăмăр. Çавăнпа та иртнĕ эрнере Александровка ял тăрăхĕнче пурăнакансем Асăну комплексĕ умĕнче чи хастар, уçă чунлă, халăхшăн ырă ĕçсем тăвакансене пуç тайма пухăнчĕç.
Чи малтанах вырăнти ветерансен совечĕн председателĕ Л.Макарова тухса калаçрĕ.
- Хырай Ĕнелĕнчи чи хисеплĕ вырăнта вырнаçнă Асăну комплексне хăтлăлатма пулăшнăшăн тавах сире. Эсир халăхшăн ырă тунăшăн ĕçĕрсем яланах ăнса пыччăр. Ялти çынсен, ваттисен ячĕпе çĕре çити тайма пуç сире, ырă чунлă çынсем, - терĕ Людмила Михайловна.
Çавăнпа пĕрлех пухăннисен умĕнче Валерий Гордеев, Александр Зайцев, Анатолий Потемкин, Валери Туркай спонсорсем, Александр Капитонов тухса калаçрĕç. Вĕсене тав хучĕсем парса чысларăмăр. Хырай Ĕнелĕн хисеплĕ гражданинĕсем Г.В.Квасов, М.Я.Седлова, А.М.Чемешева, Н.Я.Зайцева ветерансем те пысăк ĕç тума пулăшнисене тав сăмахĕ каларĕç. 1-мĕш класс пĕтернĕ Кирилл Белков тăван ял пирки чĕрене пырса тивмелле сăвă вуларĕ.
Л.МАКАРОВА.
Источник: "Каçал Ен"