05 августа 2016 г.
Пысăк пĕлтерĕшлĕ мероприяти - Пĕтĕм Раççейри ял хуçалăх çыравĕ - вĕçленсе пырать. Çыравра ял хуçалăх отрасльне пур енлĕн тишкереççĕ. Ара, тĕрĕс кăтартусемсĕр АПК-на тухăçлă аталантарма, ял хуçалăх таварне туса илекенсене патшалăх енчен тивĕçлипе пулăшма йывăр. Комсомольски районĕпе ĕçлекен 24 çыравçă ял хуçалăх таварĕ туса илекенсене - хушма хуçалăх, дача, сад-пахча тытакансем патне, фермер хуçалăхĕсене, организацисене çитсе ыйтусем çине хуравсем пуçтараççĕ. Çавăн пекех перепиçре ял хуçалăх пĕлтерĕшлĕ çĕрпе арендăра, харпăрлăхра усă куракан е выльăх-чĕрлĕх усракан предприяти-организацие, уйрăм çынсене те шута илеççĕ.
Ку эрне пуçламăшĕнче вара районти переписчиксем хресчен фермер хуçалăхĕсен даннăйĕсене пуçтарса та пĕтернĕ. Килти хушма хуçалăх тытакансен 10702 хуçалăхран 88,9 процентне вĕçленĕ. Переписчиксем хăйсен яваплă ĕçне вăхăтра пĕтерессинче вара пĕр иккĕленỹ те çук. Юлнă проценчĕ те - ытларахăшĕ кил хуçисене тĕл пулайманнисем.
Кашни çыравçăн ятарлă удостоверени пур. Çавăнпа та ют çынран хăрамалла мар, ыйтусем çине хуравлама ыйтсан пытарса тăмалла мар. Çырав вăхăтĕнче çынсенчен выльăх, çĕр шутне ыйтса пĕлнĕ е ытти сведенисене илнĕ чух документ ыйтмаççĕ. Çапах та сирĕн информацие туллин пĕлтерме тăрăшмалла. Мĕншĕн тесен эсир панă хуравсенчен районта, республикăра, çĕршывра ял хуçалăхĕ малашне аталанасси килет. Çыравра пухнă пĕтĕмĕшле информацие тĕпе хурса ял хуçалăхне кирлĕ пек тимлĕх уйăрĕç.
Н.ВОРОНОВА.
Источник: "Каçал Ен"