05 августа 2016 г.
Шкулсем ачасене кĕтсе илме хатĕрленеççĕ. Юсав ĕçĕсем туса классене, коридорсене хăтлăх кỹреççĕ. Паянхи кун пирĕн районта - 29 вĕренỹ учрежденийĕ. Вĕсенчен 21-шĕ - пĕтĕмĕшле пĕлỹ паракан шкулсем, 3-шĕ хушма вĕрентỹ паракан учреждени. Унсăр пуçне шкул çулне çитмен шăпăрлансем валли 5 садик ĕçлет. Хăш-пĕр ялсенче ачасем кĕске вăхăтлăх ушкăнсене çỹреççĕ. Августăн 1-мĕшĕнче ятарлă комисси вĕренỹ учрежденийĕсем ачасене кĕтсе илме мĕнле хатĕрленнипе кăсăкланчĕ, çитнĕ шкулсемпе тĕплĕн паллашрĕ. Çак ĕç малалла пырать.
- Пысăк çитменлĕхсемех тупса палăртман. Апла пулин те август уйăхĕнче пурнăçламалли, пуçланă ĕçе вĕçне çитермелли пур-ха. Пĕтĕмĕшле илес пулсассăн, вĕренекенсене парта хушшине лартма хатĕр темелле. Тĕрĕслевпе çитнĕ шкулсем тĕплĕн хатĕрленнĕ. Уйрăмах вара Комсомольски 1-мĕш тата Урмаел вăтам шкулĕсен вĕренекенĕсем туса ирттернĕ ĕçсемпе савăнĕç. Ара, вĕсене тĕплĕн юсанă спортзалсем кĕтеççĕ. Унта пур çĕрте те тирпей-илем хуçаланать, классене юсанă, урайсене сăрланă. Шкулсенче пушар хăрушсăрлăхĕн тĕп правилисене çирĕп пăхăнаççĕ. Çавна май пур çĕрте те ятарлă сигнализаци лартнă, - палăртать район администрацийĕн вĕренỹ пайĕн начальникĕ Надежда Петрова.
Хăш-пĕр шкулсенче вара хĕрỹ ĕç вăхăчĕ пырать тесен те йăнăш мар. Вĕсем палăртнă ĕçе çитес кунсенче вĕçлес тесе тăрăшаççĕ. Хĕле хатĕрленес енĕпе те ĕçсем пыраççĕ. Котельнăйсене юсанă, çĕнетнĕ.
Паянхи куна тĕрĕслев малалла тăсăлать, районти 5 вĕренỹ организацине тĕрĕсленĕ те ĕнтĕ.
Районта пурĕ 2778 вĕренекен, пуçласа парта хушшине 301 ача ларать.
Н.БЕЛКОВА.
Источник: "Каçал Ен"