29 июля 2016 г.
Пур политика партийĕн те суйлав умĕнхи съезчĕсем хыçра ĕнтĕ. Партисен Патшалăх Думин депутачĕсен кандидачĕсен пĕтĕмĕшле списокĕсем те хатĕр. Эпир авăн уйăхĕн 18-мĕшĕнче Чăваш Ен Патшалăх Канашне те суйлатпăр. Патшалăх Канашĕн депутачĕн кандидачĕсене политика партийĕсенчен регионти партконференцисенче тăратаççĕ.
Утă уйăхĕн 22-мĕшĕнче, "Единая Россия" партин регионти ХХIV партконференцийĕ иртрĕ. Единороссем хăйсен форумне Чăваш патшалăх филармонийĕнче ирттерчĕç. Ăна йĕркелекенĕсем конференци ирттерме тĕплĕн хатĕрленнĕ. Фойере вĕрсе каламалли музыка оркестрĕ вылярĕ. Пỹлĕме парти стилĕн уйрăмлăхĕсене шута илсе илемлетнĕ. Фойе тăршшĕпех лартса тухнă "Единая Россия" команди тунă" стендсем. Çỹлтен аялалла вырнаçтарнă куçăмлă плакатсенче тĕрлĕ ĕçре тата тытăмра тунă ỹсĕмсене уçăмлăн та пурне те ăнланмалла кăтартса панă.
Конференци уçăлас умĕн кăтартнă пысăках мар фильм та çав темăна халалланăскерех пулчĕ. Пĕтĕмĕшле илсен, единороссен каласа памалли пурах. Конференци пынă вăхăтра та вĕсем умра тăракан çивĕч ыйтусене сỹтсе явассинчен пăрăнмарĕç. Тухса калаçнă çынсен сăмахĕсенчи тĕп шухăш çапла пулчĕ: вĕсем общественноçпа кирек мĕнле ыйтусене те, çав тери çивĕчленсе çитнисене те, сỹтсе явма хатĕр.
Конференцие "Единая Россия" партин Чăваш регион уйрăмĕн секретарĕ Николай Малов уçрĕ, вăлах ертсе пычĕ. Конференцин президиумне тата ĕç органĕсене йĕркеленĕ хыççăн форум хăйĕн тĕп ĕçне тытăнчĕ.
Конференцие хутшăннисене Чăваш Республикин Пуçлăхĕ Михаил Игнатьев саламларĕ. Михаил Васильевич хăйĕн уçăмлă та хĕрỹллĕ сăмахĕнче Чăваш Енĕн социаллă пурнăçĕпе экономика аталанăвĕнче тунă тĕп ỹсĕмсемпе çитĕнỹсем çинче кĕскен чарăнса тăчĕ. Вăл палăртнă тăрăх, вĕсем пĕтĕмпех республика Правительстви "Единая Россия" партин регионти парторганизацийĕпе тачă çыхăнса ĕçленипе пулнă. Йышăннă программăсем пурнăçа кĕреççĕ, шантарнисем сăмахпа çирĕпленеççĕ. Анчах та, Михаил Игнатьев каланă тăрăх, хальлĕхе нумай ыйту çав-çавах çивĕч тăрать-ха. Вăл конференцие хутшăннă çынсене хастар ĕçлеме чĕнсе каларĕ тата çитес суйлавра сулăмлăнах çĕнтерес шанчăк пуррине палăртрĕ. Вăл каланă сăмахсем ĕнентерỹллĕ пулнине сцена варринче вырнаçтарнă пысăк экран çинче кăтартакан слайдсем те лайăх çирĕплетрĕç.
Çакăн хыççăн чăваш единоросĕсен лидерĕ Николай Малов сăмах илчĕ. Вăл регионти парти организацийĕн ĕç-хĕлне тĕплĕн тишкерсе тухрĕ. Николай Владимирович Раççей Президенчĕ Владимир Путин партин ХV съездĕнче каланă сăмахсенчи йĕркесене илсе кăтартнă май, çынсене итлеме пĕлни, шантарса каланă сăмахсемшĕн яваплăха туйма кирли, шалти политика лару-тăрăвĕнче сулăмсем пулмалла марри çинчен аса илтерчĕ. Николай Малов çавăн пекех партин суйлав умĕнхи тата ун хыççăнхи çулсенчи вăраха ямасăр пурнăçа кĕртмелли задачисене палăртрĕ. Вăл çавăн пекех хăйĕн ĕçтешне Леонид Черкесова 38-мĕш Шупашкар суйлав округĕ тăрăх РФ Патшалăх Думине депутата суйлама кандидата тăратнă ятпа саламларĕ.
Малалла Шупашкарти 5-мĕш номерлĕ гимнази директорне Инна Исаевăна сăмах пачĕç. Инна Владиславовна партин "Чăваш Ен - пурăнма хăтлă регион. Аталану приоритечĕсем" проектне пурнăçлас темăна хускатрĕ. Вăл çĕршыв ертỹлĕхĕ - Раççей Президенчĕ тата "Единая Россия" парти лидерĕ Владимир Путин тата Правительство пуçлăхĕ Дмитрий Медведев - хальхи экономика условийĕсенче тĕп тата приоритетлă çул-йĕр çине тĕллевлĕн пăхма чĕнсе каланине палăртса хăварчĕ. Парти проекчĕ шăпах çав çул-йĕре суйласа илнĕ те, вăл партин суйлав умĕнхи программине ылмаштармасăр унăн хушăмĕ пулса кĕрет. Инна Исаева тата партин Чăваш регион уйрăмĕ ку енĕпе унчченех ĕçлеме пуçланине, ку, вăл шухăшланă тăрăх, республикăри парти организацийĕн пиçĕлĕхĕ çинчен каланине палăртрĕ.
Единороссен ĕç-хĕлне йĕркелесе пыракан программа никĕсĕнче - общественноçпа ялан тачă çыхăнура пуласси. "Çавра сĕтел" калаçусем, тематикăлла форумсем йĕркелеме палăртнă. Халăхпа ирттерекен тĕлпулусенче çынсем час-часах хускатакан ыйтусенчен ытларахăшĕ - медицина аталанăвĕпе, çул-йĕр тăвассипе, тивĕçлĕ шалу тỹлекен ĕç вырăнĕсем уçассипе çыхăннисем. Чăваш Енри единороссем çитес çулсенче шăпах çак енсене тарăн тимлĕхе илсе ĕçлеме палăртаççĕ.
Малалла конференцин организациллĕ, ĕçлĕ тапхăрĕ пуçланчĕ. Чăваш Енĕн Патшалăх Канашне "Единая Россия" партирен суйланма тăратнă кандидатсен списокне вуласа пачĕç. Тăхтав вăхăтĕнче вăрттăн сасăлассине йĕркелесе ирттерчĕç, унтан конференци делегачĕсем сасăлав кăтартăвĕсене çирĕплетрĕç.
Конференци вĕçĕнче Шупашкар хулин иккĕмĕш больницин тĕп врачĕ Лидия Веденеева калаçрĕ. Вăл делегатсене "партин пĕрлехи фронтне" туса хума чĕнсе каларĕ. Пурне те çынсем патне çитме, вĕсене ку таранччен парти мĕнле ĕçсем тунине, малашлăх планĕсемпе пуласлăх çул-йĕрĕсем çинчен каласа пама ыйтрĕ. Лидия Владимировна шухăшĕпе, партин кашни хастар членĕн çак ĕçе хăйĕн тỹпине хывмалла. Çавăн чухне кăна парти витĕмлĕ çĕнтерỹ тăвĕ. Унăн сăмахне залра ларакансем алă çупсах йышăнчĕç.
Кăмăл-туйăмсем харсăр, приоритетсем паллă, малашлăхра ĕç нумай. "Единая Россия" партин конференцийĕнчи атмосферăна тата унăн пĕтĕмле-тĕвĕсене кĕскен çапла хаклама пулать.
Владимир Путин
"Суйлавçăсем "Единая Российăна" шанаççĕ, çак шанчăк вăхăтпа тĕрĕсленнĕ, конкретлă ĕçсемпе тата çитĕнỹсемпе, суйлав умĕн панă сăмахсене пурнăçланипе çирĕпленнĕ. Пĕрле кирек мĕнле йывăрлăхсемпе задачăсене те татса парасса шанатăп. Эпир çынсене илтме пĕлсен çеç çакна пурнăçлама пулĕ".
"Единая Россия" партин ХV съездĕнче каланинчен.
http://www.kremlin.ru/events/president/news/52279
Конференци участникĕ Петр Краснов:
- 2015 çулта "Единая Россия" партин Чăваш регион уйрăмĕ республика Пуçлăхĕн кандидачĕ пулма Михаил Игнатьева "Пĕрле пурăнар - пĕрле ĕçлер" халăх программипе шанчĕ. Суйлав умĕнхи çак программа никĕсĕнче - экономикăна пулăшасси, агропромышленноç комплексне аталантарасси, апат-çимĕç хăрушсăрлăхне тивĕçтересси, медицина пулăшăвĕн пахалăхне ỹстересси, картишсене тирпей-илем кĕртесси. Партин ЧР Патшалăх Канашĕн 2016 çулхи суйлавĕ умĕнхи "Чăваш Ен - пурăнма хăтлă регион. Аталану приоритечĕсем" программи унăн тăсăмĕ пулĕ. Ун тăрăх çитес пилĕк çулти ĕçсене йĕркелесе пырăпăр.
Маларах йышăннă программăсене тĕпе хурса ĕçленипе Комсомольски районĕн социаллă тата экономика пурнăçĕнче пысăк улшăнусем пулса иртрĕç. Районти ял хуçалăхĕ - ỹсен-тăран тата выльăх-чĕрлĕх отраслĕсем - аван аталанса пыраççĕ. Паянхи пурнăç ыйтакан фельдшерпа акушер пункчĕсем çĕкленеççĕ, çулсене юсатпăр, спортзалсене çĕнететпĕр тата ытти те. Акă, юлашки çулсенче çеç районта икĕ садик хута кайрĕ, Элпуçĕнче çĕнĕ шкул тăваççĕ, çывăх вăхăтра культура çурчĕсене те черет çитĕ.
Конференцире ЧР Патшалăх Канашĕн депутачĕсен кандидачĕсен списокне пĕрлехи тата пĕр мандатлă суйлав округĕсемпе палăртрĕç. Асăннă списоксене партин малтанхи сасăлавĕн кăтартăвĕсене тĕпе хурса йĕркеленĕ. Кандидатсен пĕрре виççĕмĕш пайĕ - "Единая Россия" партин çĕнĕ членĕсем. Вĕсем ỹсĕмĕпе те, специальноçĕсемпе те уйрăлса тăраççĕ. Çапла пулмалла та.
Источник: "Каçал Ен"