26 июля 2016 г.
Чăваш каччисенчен нумайăшĕ Тăван çĕршывăн чиккисене чыслăн хỹтĕленĕ, Раççейшĕн хăрушлăх тухса тăрсан çапăçăва та кĕнĕ. Çартан килсен те хăйсен туслăхне татман вĕсем, яланах пĕр-пĕринпе тĕл пулма хатĕр. Республикăри "Пограничное братство" обществăлла пĕрлешĕве туса хунăранпа икĕ çул ытларах çеç иртрĕ. Çапах çак хушăра кашни районтах унăн вырăнти организацине йĕркеленине тата вĕсем питĕ хастар ĕçлеме пуçланине палăртма кăмăллă. Ĕнерхи чикĕ хуралçисем çитĕнекен ăрăва патриотла воспитани пама, çар службин сумлăхне ỹстерме хутшăнаççĕ. Ветерансене асра тытса спорт ăмăртăвĕсем тăтăшах ирттереççĕ.
Акă, июлĕн 23-мĕшĕнче çакнашкал мероприятие Комсомольскине Шупашкар хулинчи, Вăрнар, Патăрьел, Канаш, Хĕрлĕ Чутай, Шăмăршă районĕсенчи ветеран-пограничниксем пуçтарăнчĕç. Чикĕ хуралçисене асăнса район центрĕнче лартнă палăк умне чечексем хунă хыççăн симĕс карттуслисем Хĕр уçланкине куçрĕç. Унта мини-футбол, волейбол, дартс вăййисенче, вырăнтан сикессипе, граната ывăтассипе, 100 метра чупассипе ăмăртусем пуçланчĕç. Хĕрỹ тупăшусенче спортăн чылай тĕсĕнче Комсомольскисем малти вырăнсене йышăнчĕç. Акă, волейбол вăййинче пирĕн команда чи çаврăнăçулли пулса çĕнтерỹçĕ ятне тивĕçрĕ. Шупашкарсем - иккĕмĕш, Патăрьелсем виççĕмĕш вырăнсене пайларĕç. Дартсра Валерий Чернов, граната ывăтса Владимир Лепешкин, 100 метра чупса Петр Козловпа (50 çултан аслăраххисем хушшинче) Павел Петухов (50 çулчченхисем) пĕрремĕш вырăна алăран вĕçертмерĕç. Тăршшĕне сикессинче те ентешсем палăрчĕç. 45 çулчченхисенчен тата унран аслăраххисенчен çивĕччисем пулса Станислав Козловпа Геннадий Филиппов иккĕмĕш вырăн хуçисем пулса тăчĕç. Геннадий Николаевич хăйĕн ỹсĕмĕнче 100 метра иккĕмĕш парăнтарчĕ, Александр Афки вара - виççĕмĕш.
Республикăри пограничниксен "Пограничное братство" обществăлла организацийĕн председателĕпе Анатолий Шорниковпа районти уйрăмăн ертỹçин çумĕ Геннадий Филиппов çĕнтерỹçĕсене дипломсемпе тата медальсемпе наградăларĕç. Асăннă мероприятие хатĕрленсе ирттерме пулăшнисем, спонсорла пулăшу панисем, организаци ĕçĕнче хастарлăхпа палăрнисем те тав сăмахĕсене тивĕçрĕç.
Тупăшусем вăхăтĕнче участниксемпе куракансене Петр Павлов утçă юланутçăсен ăмăртăвĕсен темиçе хут чемпионĕпе, "Пульс" ятлă лашипе ярăнтарчĕ. Спецназ ветеранĕ, Çурçĕр Кавказра службăра пулнă Александр Мингалев, Николай Андреев, ентешсем Павел Ивановпа Михаил Кузнецов патриотла юрăсемпе савăнтарчĕç. Ольгăпа Вениамин Крыловсем, Тамарăпа Николай Юмановсем, Владимир Герасимов вара хăнасене хуранта хатĕрленĕ техĕмлĕ шỹрпепе хăналарĕç.
Л.ШУРЯШКИНА.
Источник: "Каçал Ен"