12 июля 2016 г.
"Çĕрулмие мухтав" агрофирмăра çулсеренех Уй-хир кунне йĕркелессине йăлана кĕртнĕ ĕнтĕ. Акă кăçал та июлĕн 9-мĕшĕнче тĕрлĕ регионсенчен - Тутарстан Республикинчен, Ульяновск, Оренбург, Чулхула, Свердловск облаçĕсенчен, Çурçĕр Осетирен - килсе çитнĕ хăнасем çĕрулми туса илес опытпа паллашрĕç, "иккĕмĕш çăкăр" лартнă уйсене çитсе курчĕç.
Уй-хир кунне "Çĕрулмие мухтав" агрофирмăн генеральнăй директорĕ Хасиятулла Идиатуллин уçрĕ. Вăл семинар тĕллевĕпе, килнĕ хăнасемпе паллаштарчĕ. Чăваш Республикин ял хуçалăх министрĕн çумĕ Константин Никитин, район администрацийĕн пуçлăхĕ Алексей Самаркин, "АСК" ОООн соучредителĕ Александр Капитонов семинара хутшăнакансене уявпа саламларĕç, тухăçлă кун сунчĕç. Çĕрулми туса илес енĕпе ĕçлекен специалистсем кăсăклă докладсемпе тухса калаçрĕç. Акă, "Çĕрулми пĕрлешĕвĕн" директорĕ Алексей Красильников 2015-2016 çулсенчи çĕрулмипе пахча çимĕçĕн рынокри лару-тăрăвĕ, 2016-2017 çулсенчи тĕллевсем çинчен каласа пачĕ. Çĕр пахалăхне лайăхлатас ыйтусемпе, хуравĕсемпе ял хуçалăх наукисен кандидачĕ, "Агро-инновации" КУП ЧР консультанчĕ Владимир Мутиков паллаштарчĕ. "ТАВ" СК" ООО директорĕ Василий Антонов "АСК" ООО хранилищисене тĕпе хурса çĕрулми упрамалли хранилищĕсен проекчĕпе строительстви пирки тĕплĕн каласа пачĕ.
Хасиятулла Семигуллович ĕç-хĕлпе паллаштарса агрофирма аталанăвĕн çĕнĕ концепцийĕсемпе малашнехи тĕллевĕсем çинче чарăнса тăчĕ.
Конференци залĕнчи калаçу хыççăн ĕçлĕ ушкăн "иккĕмĕш çăкăр" пуссине çул тытрĕ. Çумăр тахçантанпах çуманнине пула хирсем типме те ĕлкĕрнĕ. Уй-хир кунĕнче çумăр çуни курав ирттерме, ĕçпе паллашма чăрмав кỹмерĕ, ял хуçалăх предприятийĕсен ертỹçисем савăнчĕç çеç. Тип-тикĕс те ем-ешĕл курăнакан йăрансем çине вара куç илмесĕр пăхас килет. Елчĕк районĕнчи хирсенче çитĕнекен Гала, Ред Скарлетт, Инноватор, Коломба, Ривьера, Эволюшен сортсен пахалăхĕ, тухăçлăхĕ çинчен агрофирма агрономĕ Алексей Селиванов каласа пачĕ, специалистсем шăваракан оборудовани пирки пĕлтерчĕç.
Агрофирмăра пултаруллă ĕçченсем тăрăшаççĕ. Механизаторсем те, рабочисем те ăста, пур агротехника ĕçне те пахалăхлă пурнăçлаççĕ. Пысăк тухăçлă çĕрулмине хĕл каçарса, çуркунне хаклăрах сутас тĕллевпе ĕçлеççĕ. Агрофирмăн Елчĕк районĕнчи Кỹлпуçĕнче ятарлă хранилище те пур. Ĕçлĕ ушкăн унта та çитсе курчĕ. "ТАВ" строительство компанийĕ хăпартнă хранилищĕре продукцие упрама çав тери меллĕ. Ĕçченсем хĕлĕпех çĕрулмие виçсе, тĕрĕслесе тăрса сутма хатĕрлеççĕ. "АСК-Яльчики" ООО директорĕ Юрий Галкин тата Рамиль Идиатуллин инженер-техник хранилище пирки каласа пачĕç, кăсăклантаракан ыйтусем çине хуравларĕç.
Семинара хутшăнакансем çĕнĕ йышши техника, ỹсен-тăрана чиртен, сиенлĕ хурт-кăпшанкăран хỹтĕлемелли им-çам туса кăларакансемпе тата сутакансемпе те калаçрĕç. Семинар ĕçне кунтах, хранилищĕрех, пĕтĕмлетрĕç, вăл çỹлти шайра иртнине палăртрĕç.
Н.АРХИПОВА.
Источник: "Каçал Ен"