08 июля 2016 г.
Иртнĕ эрнере Мускавра "Единая Россия" партин XV съезчĕн иккĕмĕш тапхăрĕ иртнĕ. Шăпах унта партин суйлав умĕнхи программине - Раççейĕн малашнехи пилĕкçуллăхри аталану планне сỹтсе явнă тата сентябрĕн 18-мĕшĕнче РФ Патшалăх Думине суйланакан кандидатсене çирĕплетнĕ.
"Единая Россия" партин суйлав умĕнхи программине çирĕплетме чылай вăхăт хатĕрленỹ ĕçĕсем йĕркелени тата съездра Раççей аталанăвĕн çăлкуçĕсене халалланă 10 яхăн дискусси площадкисем витĕм кỹнĕ.
Чăваш Ен делегачĕсем съездăн секци ĕçĕсене тата пленарлă пайне хутшăннă. "Единая Россия" парти суйлава тăратнă кандидатсем, Шупашкар хула пуçлăхĕ Леонид Черкесов, РФ Патшалăх Думин депутачĕ Алена Аршинова, Чăваш Патшалăх Канашĕн председателĕн çумĕ Николай Малов, Шупашкар хулин депутачĕсен Пухăвĕн депутачĕ Николай Владимиров ятарлă пресс-конференцире съезд йышăнăвĕсене хакласа хăйсен шухăш-кăмăлне пĕлтернĕ.
Тĕслĕхрен, Чăваш регион уйрăмĕн секретарĕ Николай Малов "Единая Россия" парти пуçаруçи - Раççей Президенчĕ Владимир Путин тата Дмитрий Медведев премьер-министр тухса калаçни съездăн тĕп çăлкуçĕ тесе палăртать. Владимир Путин парти ĕç-хĕлне сăнаса тăрать тата кулленхи ĕçре тĕп çăлкуçсене палăртать. Николай Малов çавăн пекех "Единая Россия" партин суйлав умĕнхи федераци программине съездченех маларах йышăннине каласа хăварнă. Регионти уйрăм "Чувашия - регион комфортного проживания. Приоритеты развития" çитес пиллĕкçуллăха йышăннă парти проекчĕпе паллаштарнă. Приоритетлă çул-йĕрсем пĕр килни, парти пĕр шухăшлă пулнине, малашне килĕштерсе ĕçлессине пĕлтерет.
Шупашкар хула пуçлăхĕ Леонид Черкесов ĕçтешĕн сăмахĕсемпе килĕшсе çапла пĕлтернĕ:
- Эпир республикăра çỹлтен хушассине кĕтмесĕрех ĕçленĕ, малашне те çаплах тăрăшасшăн. Эпир ял тăрăхĕсенче тата Шупашкар хулинче пурăнакансемпе тĕл пулатпăр. Шăпах çак тĕлпулусенче тĕллевсене, пурнăçламалли ĕçсене палăртатпăр. Çакна эпир çитес пилĕк çулта пурнăçламалли ĕç планĕсене палăртма йĕркелетпĕр.
Шупашкар хула пуçлăхĕ "Единая Россия" регионти уйрăмĕн представителĕсем нихăçан та пурнăçлама пултарайман ĕçсене пуçăнманнине уйрăммăн палăртса хăварнă. "Пирĕн çынсене ахаль шантарни кирлĕ мар, - пĕлтернĕ вăл.
Леонид Черкесов съездăн "Пурнăç пахалăхĕ" секцин ĕçне хутшăннине каласа пачĕ. Унта эконом-класлă çурт-йĕр тăвассине, хула тавралăхне аталантарассине, хула экологине пырса тивекен ыйтусене сỹтсе явнă. Вăл пĕлтернĕ тăрăх, республикăра пурăнакансене авариллĕ çурт-йĕрсенчен куçарас ĕçе мĕнле йĕркеленипе паллаштарнă хыççăн, ытти регионсемпе хула пуçлăхĕсем тĕрлĕ ыйтăва сỹтсе явма пыни уншăн чăннипех те кĕтменлĕх пулнă. Авариллĕ çурт-йĕрсенче пурăнакансене çĕнĕ хваттерсемпе тивĕçтерессипе муниципалитет шайĕнче йышăннă тĕслĕх Раççейри пĕртен-пĕр хуласенчен пĕринче - Шупашкарта - иккен.
РФ Патшалăх Думин вĕренỹ енĕпе ĕçлекен комитечĕн председателĕн çумĕ Алена Аршинова "Вĕренỹ" профиль секцине хутшăннă. Вăл пĕлтернĕ тăрăх, çакăн йышши мероприятисем практикăшăн çав тери пĕлтерĕшлĕ. Тĕслĕхрен, дискусси площадкинче - РФ вĕренỹ министрĕ, Рособрнадзор представителĕсем. Алена Аршинова çакăн йышши ĕç пĕтĕмлетĕвĕсемпе килĕшỹллĕн тĕрлĕ йышăнусемпе пуçарусем ĕçе кĕрессине пĕлтернĕ. Унăн сăмахĕсемпе килĕшỹллĕн "Вĕренỹ пирки" саккуна та улшăнусем кĕртмелле. Вĕсем ача сачĕшĕн, "продленкăшăн", студентсен общежитийĕшĕн тỹлессине пырса тивеççĕ. Çавăн пекех вăл ялти шкулсенче пулса курнă май, çитес вăхăтра "Шкул автобусĕ" программа хута каяссине пĕлтернĕ.
Николай Владимиров кандидат съезд йĕркелени тĕрлĕ регионсенче пурăнакансене пĕр площадкăра пуçтарса, пĕр-пĕринпе тĕрлĕ ыйтусене сỹтсе явни уйрăмах паха пулнине палăртнă. Вăл саккунри пĕр пуçарупа паллаштарчĕ. Шăпах çак пуçарупа Челябинск хулинчи ĕçтешсем паллашма кăмăл тунă. Паянхи куна микрофинанс организацийĕсене пырса тивекен саккуна улшăнусем кĕртесшĕн. Унпа килĕшỹллĕн уйрăм çынсене займсем памаççĕ. Уйрăм предпринимательсемпе пĕчĕк бизнес субъекчĕсене çеç кредитпа тивĕçтереççĕ. Мĕншĕн тесессĕн "хăвăрт укçасем" пулăшупа финанс ыйтăвĕсене пĕлсех пĕтереймен граждансем усă кураççĕ те пысăк парăма кĕрсе ỹкеççĕ. Статистикăпа килĕшỹллĕн вĕсем 60 процента яхăн.
Çавăн пекех пресс-конференцире Николай Малова ыйту панă. Ăна малтанхи сасăлавра Канаш хулин пĕр мандатлă суйлав округĕпе кандидата тăратнă. "Единая Россия" партин съезчĕ хыççăн вăл парти списокне лекнĕ.
- "Единая Россия" парти пĕр мандатлă 18 суйлав округĕпе кандидатсене тăратман. Канаш округĕ вĕсен йышне кĕнĕ. Çакă шалти политика аренинче патшалăх интересĕсене шута илсе çирĕплетнĕ йышăну. Унпа пĕрлех "Единая Россия" партин Чăваш регион уйрăмĕн секретарĕ пулнă май, маншăн юлашки йышăну пĕлтерĕшлĕрех, вăл манăн мар, пирĕн командăн. Аса илтеретĕп, Владимир Путин Президент каланине, суйлава хутшăнакан кандидатсем "Единая Россия" парти çĕршыври политикăна ертсе пыракан вăй пулнине ăнланмалла, - пĕлтернĕ Николай Малов.
Источник: "Каçал Ен"