05 июля 2016 г.
Раççей Тĕп банкĕ 2017 çулта çĕнĕ хут укçасем - 200 тата 2000 тенкĕлĕххисене çаврăнăша кăларать. Вĕсем çинче сăнлакан ỹкерчĕксене Раççейре пурăнакансен суйласа илмелле. Çавна май июнĕн 28-мĕшĕнче Твоя-Россия.РФ. сайтра сасăлавăн пĕрремĕш тапхăрĕ уçăлнă. Вăл июлĕн 28-мĕшĕччен пырĕ. Çак вăхăтра Раççейре пурăнакан кашни çын хăйĕн символне сĕнме пултарать е пĕр-пĕр символшăн сасăлама ирĕк пур. Иккĕмĕш тапхăрта (августăн 5-30-мĕшĕсенче) обществăлла шухăша шута илекен фонд халăхра ыйтăм йĕркелет. Ыйтăм пĕтĕмлетĕвĕсемпе килĕшỹллĕн паллă 10 хулана тата символсене палăртаççĕ. Сасăлавăн виççĕмĕш тапхăрĕнче, сентябрь уйăхĕнче, 10 хула-лидертан иккĕшне тата 4 символа суйласа илеççĕ. Шăпах вĕсене çĕнĕ укçасем çинче пичетлеççĕ те.
Палăртма кăмăллă, Чăваш Республикинче пурăнакансем Твоя-Россия.РФ. сайтра хăйсен сĕнĕвĕсене хăварма та ĕлкĕрнĕ. Вĕсем Андриян Николаев, Василий Чапаев палăкĕсене, "Анне" монумента тата ытти паллă вырăнсене сĕннĕ.
Сасăлава кашнинех хутшăнар. Çĕнĕ укçа-тенкĕсем çинче Чăваш Енĕн паллă вырăнĕсем сăнлансан пит аван.
Источник: "Каçал Ен"