28 июня 2016 г.
Анлă коридорсем, шавлă класс, çывăх юлташсем, хаклă учительсем... Çулсем иртĕç, эпир çитĕнĕпĕр, анчах та шкул пирĕн асра яланлăха юлĕ... Июнĕн 24-мĕшĕнче, Республика кунĕнче, Комсомольски ялĕн центрĕнче районти выпускниксен 3-мĕш парачĕ иртрĕ. Çав каç районти вăтам шкулсен 160 выпускникĕ алла аттестат илчĕ, шкул парттисемпе сывпуллашрĕ.
Выпускниксем хушшинче Пĕтĕм Раççейри предмет олимпиадисен районти, регионри тапхăрĕсен, халăхсем тата регионсем хушшинчи, республикăри олимпиада-конкурссен призерĕсемпе çĕнтерỹçисем, вĕренỹре те, спортра та хастаррисем, "Орленок" çарпа спорт вăййисен участникĕсем, республика тата район администрацийĕн пуçлăхĕсен стипендиачĕсем пулчĕç. Хĕрĕсемпе тата ывăлĕсемпе, мăнукĕсемпе пĕрле савăнма ашшĕ-амăшĕ, аслашшĕ-асламăшĕ те пуçтарăнчĕç.
Ачасене, пухăннисене чи малтан Комсомольски район администрацийĕн пуçлăхĕн çумĕсем Н.А.Петровăпа С.Г.Ульдина саламларĕç, ăнăçу, пысăк çитĕнỹсем сунчĕç.
- Паян эсир шкулпа сывпуллашатăр, кашнине юратса ăс-тăн панă, ырри енне туртăнма, Тăван çĕршыва юратма, темĕн те ăсталама, юрлама, ташлама, пурăнма вĕрентсе çул пилленĕ вĕрентекенсене тав сăмахĕ калатăр. Сирте - çĕршыв пуласлăхĕ, умăрта çĕр тĕрлĕ професси пулин те, эпĕ сире чун туртаканнине суйласа илме, тĕллев патне ăнтăлма сунатăп. Уяв ячĕпе сире, выпускниксем! - чĕререн тухакан салам сăмахĕсене каларĕ Надежда Александровна. Светлана Геннадьевна та ачасене ыр сунса биографин кашни страницине творчествăлла шыравпа, хавхаланупа тултарма, районпа Раççейшĕн тăрăшуллă ĕçлеме сунчĕ.
Вăтам шкулсен выпускникĕсене, вĕренỹре чи маттуррисене, спортра тата обществăлла ĕçре хастаррисене Надежда Петровăпа Светлана Ульдина ылтăн медальсем, район администрацийĕн пуçлăхĕн Тав хучĕсем парса чысларĕç. Кăçал районти 42 вĕренекен ылтăн медале тивĕçрĕ: Настя Абукина, Эльмира Айнетдинова, Эдуард Антонов, Татьяна Афанасьева, Алина Бататова, Надежда Белкина, Айсылу Гайнутдинова, Василий Галкин, Любовь Галкина, Радиф Гимальдинов, Вера Григорьева, Наталья Григорьева, Настя Давыдова, Айгель Зарипова, Гузель Зарифзянова, Гелшат Ибрагимова, Анна Иванова, Виктория Иванова, Светлана Ильина, Елена Индюкова, Элиза Камальтдинова, Ирина Козлова, Татьяна Афанасьева, Юлия Кузьмина, Ольга Макарова, Андрей Мамуткин, Максим Минин, Дарья Мухина, Роман Орешкин, Кристина Полякова, Полина Рябчикова, Александр Соловьев, Екатерина Соловьева, Анна Таборкина, Евгений Терентьев, Настя Тишова, Ренат Феткуллин, Зухра Шайдуллина, Гельшат Шейгереева, Кирилл Ядров, Алена Яковлева, Дина Ямалиева.
Выпускниксене педагогика ĕçĕн ветеранĕ, Раççей Федерацийĕн пĕтĕмĕшле вĕрентĕвĕн тава тивĕçлĕ ĕçченĕ Галина Антоновна Смирнова ăнăçупа пысăк çитĕнỹсем сунчĕ. Ашшĕ-амăшĕ ячĕпе вара Марина Шумилкина тухса калаçрĕ, пухăннисемпе пĕрле чĕрене пырса тивекен юрă шăрантарчĕ.
Çав каçхи тĕп геройсен ячĕпе Комсомольски 2-мĕш вăтам шкул выпускникĕ Максим Минин тухса калаçрĕ.
- Хисеплĕ вĕрентекенсем! Акă çитрĕ те çак пăлхантаракан самант. Эпир паян тăван, юратнă шкулпа сывпуллашатпăр. Нумай-нумай çул иртсен те пирĕн чĕресем лăпланмĕç, сире, пирĕн тимлĕ вĕрентекенсене, эпир пархатарлăх туйăмĕпе аса илĕпĕр. Эсир пире наукăсен никĕсĕсене çеç мар, тĕрĕслĕхе, ырă тата тỹрĕ кăмăллăха, çын пулма вĕрентнĕ. Пĕтĕм выпускник ячĕпе эпĕ сире тава тивĕçлĕ ĕçĕршĕн пуç тайса тав сăмахĕ калатăп, - терĕ Максим.
Юлашки шкул вальсĕ, выпускниксен юрри тата фейерверк, шарсемпе кăвакарчăнсене вĕçтерсе яни уроксем, тăхтавсем вĕçленнин чăн символĕ пулса тăчĕç.
Н.АРХИПОВА.
Источник: "Каçал Ен"