24 июня 2016 г.
Нумаях пулмасть Комсомольски район администрацийĕн ЗАГС уйрăмĕн тата Комсомольски ял поселенийĕн специалисчĕсем 50 тата 55 çул пĕрле пурăнакан Перепелкинсемпе Смирновсен çемйисене çитнĕ.
Геннадий Илларионовичпа Мария Дмитриевна 50 çул каялла июнĕн 15-мĕшĕнче пĕрлешнĕ. Мăшăр икĕ хĕр - Надеждăпа Инессăна - çитĕнтернĕ, тивĕçлĕ воспитани панă. Çавăнпа пĕрлех юбилярсене 4 мăнукĕ хăйсен ĕçри тата вĕренỹри çитĕнĕвĕсемпе савăнтараççĕ.
Мария Дмитриевна - Раççей Федерацийĕн тава тивĕçлĕ вĕрентекенĕ. Вăл çĕр-çĕр ачана ăс панă. Ĕçленĕ вăхăтра пĕрре мар район шайĕнчи, Чăваш Республикин Вĕренỹ министерствин Хисеп грамотисене тивĕçнĕ.
1961 çулхи июнĕн 15-мĕшĕнче вара хăйсен хутшăнăвĕсене изумруд юбилярсем - Смирновсем - регистрациленĕ. Вĕсен ывăлпа хĕр - Геннадийпе Ирина. Мăшăр ачисене лайăх пĕлỹ парас, çĕршыва тивĕçлĕ çынсем ỹстерес тесе нумай тăрăшнă. 4 мăнукĕпе 5 кĕçĕн мăнукĕ хăнана килсен ватăсем чунтан хĕпĕртеççĕ.
Александр Васильевичпа Валентина Александровна хăйсен пурнăçне "Красный маяк" колхозпа тата "Комсомольский" совхозпа çыхăнтарнă. Вĕсем иккĕшĕ те "Ĕç ветеранĕ" хисеплĕ ята тивĕçнĕ.
Пĕрлешнĕренпе çур ĕмĕр иртнĕ пулсан та, Перепелкинсемпе Смирновсем юратупа пĕр-пĕрне хисеплес туйăма çухатман. Унсăр пуçне вĕсем çамрăк çемьесемшĕн чăн-чăн тĕслĕх пулса тăраççĕ.
Этем çут тĕнчене килсенех - амăшĕн, кĕске вăхăтранах çемье ăшшине туйма тытăнать. Çутçанталăк саккунĕпе килĕшỹллĕн тĕнчери чи çывăх çынсем - пĕр çемьере пурăнакансем. Вĕсем тĕрĕс-тĕкел, ырă-сывă чухне темĕнле йывăрлăха та сирме пулать. Çемье йĕркеллĕ чухне пирĕн патшалăх та тĕреклĕ.
О.ФЕДОТОВА.
Источник: "Каçал Ен"