24 июня 2016 г.
Июнĕн 21-мĕшĕнче Шупашкарта çăмăл атлетикăпа иртекен Раççей чемпионачĕн иккĕмĕш кунĕнче, шăчăпа сикекенсен секторĕнче куракансем икĕ хутчен олимп чемпионкипе Елена Исинбаевăпа Анжелика Сидорова хушшинчи халиччен пулман кĕрешĕве сăнанă.
Исинбаева хĕрачине çуратнă хыççăн виçĕ çултан Шупашкарти чемпионата хутшăнать. Вăл 4,60 метр çỹллĕшне тỹрех парăнтарнă. Ун хыççăн 4,70 метра, иккĕмĕш тĕслĕхĕнче вара 4,80 метр çỹллĕшне çăмăллăнах илнĕ. Çак вăхăтра сикекенсен секторĕнче Мускав тата Чăваш наци командине хỹтĕлекен Елена Исинбаевăпа Анжелика Сидорова çеç юлнă. Кунта вара Сидорова 4,85 метр çỹллĕшне илсе куракансене кĕтменлĕх тунă.
Олимп чемпионкин малтанхи икĕ хучĕ, Сидорова ун чухне ăмăрту лидерĕччĕ, ăнăçсăр пулнă. Анчах виççĕмĕшĕнче Елена Исинбаева спорт паттăрлăхне кăтартса Раççей чемпионкин титулне выляса илнĕ. 4,90 метр кăçалхи сезонта тĕнчипе те чи лайăх кăтарту пулчĕ. Анжелика Сидорова çăмăл атлетикăпа Раççей чемпионачĕн кĕмĕл призне тивĕçрĕ. Çăмăл атлетикăпа Раççейĕн пĕрлештернĕ командин тĕп тренерĕ Юрий Борзаковский Е.Исинбаеван çĕнтерĕвне хакланă май спортсмен хăйĕн кăтартăвĕпе Раççейре çăмăл атлетика аталаннине, наркотикран "таса", профессионаллă спортсменсем пуррине палăртрĕ. "Çакăнпа эпир чи пысăк шайри тупăшăва тухма пултарнине çирĕплететпĕр", - тенĕ вăл.
Елена Исинбаева çĕнтерĕвне, унпа пĕрлех пĕтĕм Раççейĕн атлетикине, куракансем флешмобпа палăртнă, çав вăхăтра пĕтĕм стадион Раççей гимнне юрланă. Ăмăртăва хутшăнакансемпе хăнасем, куракансем гимна çакăн пек чунтан шăрантарнине халиччен илтменнине пĕлтернĕ.
Е. Исинбаева ăнăçлă ăмăрту хыççăн тĕттĕмчченех куракансемпе сăн ỹкерчĕксем ỹкерĕннĕ, автограф панă. Чапа тухнă Раççей чемпионкине Шупашкар хула пуçлăхĕ Леонид Черкесов та саламланă.
Раççейĕн пултаруллă спортсменкине Шупашкарсем курса юлни историе кĕрсе юлать. Çакна аса илтеретпĕр: пирĕн çăмăл атлетсене Рио-де-Жанейрăри Олимпиада вăййисене хутшăнтармаççĕ. Е.Исинбаевăна вара Тĕнчери олимп комитечĕн ялавĕпе тухма та сĕннĕччĕ. Анчах та вăл Раççей ялавĕсĕр пуçне нихăш çĕршывăннипе те унта хутшăнма хирĕçленине пĕлтерчĕ. Шупашкарти ăмăртусем уншăн спорт карьеринче юлашки пулма пултараççĕ.
Чăваш Патшалăх Канашĕн Председателĕн çумĕ Николай Малов Раççей чемпионачĕн пĕрремĕш кунĕнчех спортăн Хĕвеланăç функционерĕсен йышăнăвĕ политикăпа çыхăннине палăртнă. Чылайăшне Раççей Федерацийĕн тата унăн Президенчĕн Владимир Путинăн никама пăхăнман политики тарăхтаратех.
"Манăн тата нумай миллионлă Раççей çыннисен шухăшĕ пĕрех. Кунта политикăн пытарăнчăк енĕ пур. Спорта такăнтарас ĕçре Раççейĕн никама пăхăнман политики вĕтелентерет. Эпир çак чăрмавсенчен тухасса шанатăп. Шупашкарта иртекен Раççей чемпионачĕ те çакнах çирĕплетет. Чăвашсемшĕн çакнашкал шайри ăмăртусене ирттересси пысăк чыс, паян стадиона спорт королеви анса ларчĕ".
Источник: "Каçал Ен"