21 июня 2016 г.
Çĕршывăн хими отраслĕн Волгоградри тата Çĕнĕ Шупашкарти чи пысăк "Химпром" икĕ предприятине пĕрлештерме пултарас хыпар Чăваш Республикинчи экспертсен пĕрлешĕвĕ тата общественность хушшинче хумхану çуратрĕ. Нумаях пулмасть кун пек пуçарупа Раççей Федерацийĕн Патшалăх Думин депутачĕ, Чăваш Енри "Справедливая Россия" партин лидерĕ Анатолий Аксаков тухса калаçрĕ. Пĕр шутласан, нимĕн япăххи те çук кунта: пĕрле яланах лайăх. Асăннă тĕслĕхре вара ун пек мар.
Çĕнĕ Шупашкара Волгоградри "Химпром" предприятин оборудованине куçарма пултараççĕ. Экспертсем палăртнă тăрăх, вăл çĕршывра чи авариллисенчен пĕри. Çавăн пекех çакă Чăваш Республикин территорийĕнче Волгоградри предприятин кондициллĕ мар чĕртаварĕ тата хăрушлăх кăларса тăратакан хими каяшĕсем пулма пултарасси чăнахах та хăрушлăх çуратать.
Чăваш Енри экологсем тата професилле химиксем кун йышши сĕнĕве хирĕç пулнине уçăмлах палăртрĕç. Специалистсен шухăшĕпе, икĕ предприятие пĕрлештерни экономика тĕлĕшĕнчен тупăшлă мар пулнипе пĕрлех экологи тĕлĕшĕнчен хăрушлăх кăларса тăратать тата Чăваш Республикинче пурăнакансен сывлăхне хавшатать.
Тĕслĕхрен, Раççейри "Зеленые" экологи партийĕн регионти уйрăмĕн ертỹçи Виктор Ласс паянхи куна Чăваш Ен Раççейри чи "симĕс", экологи тĕлĕшĕнчен хăтлă 10 регион шутне кĕнине палăртрĕ. Çавăнпа та çакăн пек лару-тăрăва сыхласа хăварас тесен мĕнпур вăй-халпа усă курмалла. Унсăрăн Волгоградри кивелнĕ производствăна Çĕнĕ Шупашкара куçарса вырнаçтарни тата хими каяшĕсене турттарса килни Чăваш Республикин экологи лару-тăрăвне çеç япăхлатать.
И.Н.Ульянов ячĕллĕ Чăваш патшалăх университечĕн химипе фармацевтика факультечĕн деканĕ, химин органикăллă тата фармацевтика кафедрин заведующийĕ, тахçантанпах Çĕнĕ Шупашкарти "Химпром" предприятин партнерĕ шутланакан Олег Насакин профессор кун йышши пуçарăва мĕнле йышăннине уçăмлă палăртрĕ.
"Ман шутпа, ку шухăш пачах та ăссăрла. Кун пек тума сĕнекен çынсем: мĕн чухлĕ япăхрах - çавăн чухлĕ лайăхрах тесе шухăшлаççĕ-тĕр", - пĕлтерчĕ Олег Насакин.
"Ку лару-тăрура лайăххисене пулăшмалла, Çĕнĕ Шупашкарти "Химпром" предприятин вара асăннă лару-тăрура хăйĕн производствине ỹстермелле тата çĕнетмелле, Волгоградри предприяти çухатнă рынок пу-тăкне тултарма тăрăшмалла", - хушса хучĕ вăл.
Çакна палăртмалла, Волгоградран Çĕнĕ Шупашкара 100 тонна сарă фосфор - хăрушлăх кăларса тăратакан пĕрремĕш класлă наркăмăшлă япала тиесе янă та ĕнтĕ.
"Сарă фосфора шыв айĕпе турттарса килеççĕ тата шыв айĕнчех упраççĕ. Мĕншĕн тесен сывлăшра вăл хыпса илет. Ỹте перĕнсен тĕлкĕшме, çунма пуçлать, ăна сỹнтерме май çук. Çын чĕрĕллех çунса каять. Мĕнпур хлор хутăшĕ çуннă чухне диоксин хутăшĕсене кăларать. Çаксем вара çĕр çинчи чи хăрушă япаласем, вĕсем цианлă калирен 67 хут наркăмăшлăрах", - асăннă япала çинчен каласа панă май пĕлтерчĕ хими профессорĕ Насакин.
Волгоградри "Химпром" уçă акционерлă обществăн официаллă сайтĕнче асăннă сăлтавпа вырнаçтарнă савăнăçлă информаци уйрăмах тимлĕрех пулма хистет: "ВОАО "Химпром" территорийĕнче урăх сарă фосфор çук. Унăн çĕнĕ хуçи "Химпром" ПАО (Чăваш Республики Çĕнĕ Шупашкар хули) пулса тăчĕ.
Килĕшỹ условийĕсемпе сарă фосфора Волгоградран тиесе, турттарса каяссипе тата малашне ăна упрассипе çыхăннă тăкаксемшĕн туянакан яваплă".
Ку чухне Волгоградри химиксем тата унта пурăнакансем предприяти территорийĕнче, сăмах май, вĕсем хулара çынсем пурăнакан вырăнта упранакан кондициллĕ мар япаласем урăх регионта, вăл шутра Çĕнĕ Шупашкарта, пулни мĕнле савăннине чухламалли çеç юлать. Мĕншĕн вара куншăн Чăваш Республикинче пурăнакансен асапланмалла? Тен, кун çинчен Анатолий Аксаковран ыйтмалла?
Источник: "Каçал Ен"