17 июня 2016 г.
"Единая Россиян" Чăваш Енри уйрăмĕ партин суйлав умĕнхи платформине йĕркелеме пуçланине халалласа пресс-конференци ирттернĕ. Партин регионти уйрăмĕн ертỹçи Николай Малов пĕлтернĕ тăрăх, "Единая Россия" хăйĕн программине тунă чухне халăхăн сĕнĕвĕсемпе наказĕсене шута илет. Хальхи кăткăс экономика условийĕсенче парти умĕнче тата яваплăрах ĕç тăрать - суйлавçăсен ыйтăвĕсене шута илмелле, çав вăхăтрах бюджетри кашни тенке усăллă тăкакламалла. Çакна вара обществăпа, экспертсемпе, халăхăн хастар сийĕпе тăтăш çыхăну тытса тăрсан кăна тума пулать.
"Паянхи кунтан эпир обществăлла дискусси пуçлатпăр, ун çине тайăнса "Единая Россиян" программин тĕп тĕллевĕсене палăртăпăр, - тенĕ Николай Малов. - Вĕсене сỹтсе явма ял поселенийĕсенчи, картишсенчи йăлана кĕнĕ тĕлпулусенчен пуçласа экспертсене хутăштарса йĕркеленĕ çавра сĕтелсемпе тематика форумĕсем таранах усă курасшăн. Обществăлла дискуссине пĕтĕмлетекенни вара "Единая Россия" партин регионти уçă конференцийĕ пулĕ".
"Единая Россия" партин Шупашкарти уйрăмĕн секретарĕ, Шупашкар хула пуçлăхĕ Леонид Черкесов пĕлтĕрхи суйлавсем умĕн Халăх программине хатĕрленĕ чухне хула çыннисен наказĕсем питĕ пулăшнине, çак мел хăйне тỹрре кăларнине аса илтернĕ.
"Эпир кашни ял-хулара, районта çынсенчен вĕсен чи çивĕч нушисем çинчен ыйтса пĕлни, кайран вĕсене программăллă документа кĕртни питĕ кирлĕ тесе шутлатпăр. Тĕрлĕ ĕçе бюджета шута илсе черетпе пурнăçлăпăр, çакăнта пире Чăваш Енре пурăнакансем те пулăшĕç", - палăртнă Леонид Черкесов. Çавăн пекех вăл çынсем панă ыйтусене малалла специалистсем, экспертсем тата профессионалсем сỹтсе явасса хушса каланă.
Николай Малов вара пысăк пĕлтерĕшлĕ ĕçсене татса панă чухне "Единая Россия" чылайранпа ĕнтĕ программа е проект принципне усă курнине аса илтернĕ. Тĕслĕхрен, Чăваш Енре çак майпа виçĕ çултан аслăрах ачасене, муниципалитетсен çурринче - икĕ çултан пуçласа садикпе тивĕçтерессине татса панă. Тепĕр тĕслĕх - хуласемпе ялсенче спорт занятийĕсене валли майсем туса пани.
Республика аталанăвĕн хальхи çул-йĕрĕ те паллă - çĕнĕ ĕç вырăнĕсем тăвасси, шкулсемпе çулсен строительстви, вĕрентỹ тата медицина, ЖКХ пахалăхне çĕклесси, ял-хуласене тирпей-илем кĕртесси. "Паянхи кун приоритетсене тĕрĕс палăртакан, Чăваш Енре пурăнакансен, специалистсен шухăшне пĕтĕмпех шута илнĕ программа тумалла", - палăртнă Николай Малов. Çавăн пекех вăл регионти уйрăмăн суйлав умĕнхи платформи "Единая Россия" партин федераллă программин хушăмĕ пуласса каланă.
Шăп çак программăллă документпа тата халăх шанăçĕ çине тĕренсе "Единая Россия" партин кандидачĕсем сентябрĕн 18-мĕшĕнче Раççей Федерацийĕн Патшалăх Думин тата Чăваш Республикин Патшалăх Канашĕн суйлавне хутшăнĕç.
Çитес пилĕк çулта "Единая Россия" команди асăннă плансене пурнăçа кĕртес енĕпе ĕçлĕ, Чăваш Ен пурăнма хăтлă регион пултăр тесе тăрăшĕ.
Источник: "Каçал Ен"