17 июня 2016 г.
Хăйсен ĕçне, тивĕçне тỹрĕ кăмăлпа, чунтан парăнса пурнăçлакан тухтăрсем, медсестрасем, фельдшерсем патĕнче сипленме питĕ кăмăллă. Шурă халатлисен ылтăн аллисемпе пĕрлех ăшă сăмахĕсем те пысăк пĕлтерĕшлĕ пулни никамшăн та вăрттăнлăх мар.
Ача тухтăрĕ вара - пĕчĕк пациентсен пурнăçне, сывлăхне тĕплĕн тĕрĕслесе тăракансенчен пĕри. Ашшĕ-амăшĕ те ача чирлесен чи малтан участковой педиатртан е медсестраран пулăшу кĕтет. Тухтăр ача сывлăхне тĕплĕн тĕрĕслет, сĕнỹ-канаш парать, сиплев палăртать. Районти тĕп больницăра пысăк пĕлỹллĕ, анлă тавракурăмлă специалистсем ĕçлеççĕ. Кашниех ырă сăмаха тивĕç. Пĕчĕк пациентсен ашшĕ-амăшĕ участокри медсестран Ирина Лукиянован ĕçĕпе те кăмăллă.
Ирина Ильинична Анат Тимĕрчкассинче çуралса ỹснĕ. Амăшĕ вырăнти медпунктра санитаркăра ĕçленĕ май, хĕр-пĕрчи час-часах ăна пулăшма васканă, чирлисене еплерех сыватнине сăнанă. Çавăнпа та пулĕ, шурă халатлă ĕçчен пулас ĕмĕт Иринăра мĕн çамрăкранах çуралнă. Çĕнĕ Мăрат вăтам шкулне вĕренсе пĕтернĕ хыççăн вăл Канашри медицина училищинче ăс пухнă. Лайăх паллăсемпе çеç училищĕрен тухса Ирина Комсомольски тĕп больницинче ĕçлеме пуçланă.
Малтан вăл ача-пăча стационарĕнче вăй хунă. Унта 15 çул ĕçленĕ хыççăн, 2006 çулта, педиатрине куçнă. Унăн тата Мария Колесниченко педиатрăн участокĕнче Тукай Мишер, Асанкасси, Эльпуç, Хирти Явăш ялĕсенчен 800е яхăн ача шутланса тăрать. Кашни тухтăршăнах çумра пулăшакан медсестра пурри - чи пахи. Ачасемпе пĕр чĕлхе тупма, вĕсене ăнланма куллен пĕр-пĕрне пулăшса пыраççĕ Мария Семеновнăпа Ирина Ильинична. Вĕсем пĕрле 10 çул килĕштерсе ĕçлеççĕ.
- Медицинăри пур специалист та çыннăн сывлăхне упрас, вăхăтра пулăшу парас тесе тимлет. Пирĕн вара пĕчĕк пациента мĕн канăçсăрлантарнине, ăçта тата мĕн ыратнине пĕлмелле. Пĕчĕкскер сăмахпа каласа параймасть-çке. Çак уйрăмлăхсене туйса илесси вара çул иртнĕçемĕн, опытпа пĕрле килет. Çавăнпа та пирĕн пĕр тĕллев - кашни ачана çирĕп сывлăхлă ỹстересси, кирлĕ вăхăтра тивĕçлĕ пулăшу парасси, - тет Ирина Ильинина ĕçĕпе паллаштарса.
Ирина Лукиянова Кĕçĕн Çĕрпỹелĕнче пурăнать. Икĕ ывăлĕ те çитĕннĕ ĕнтĕ. Асли, Женя, çемйипе Мускавра тĕпленнĕ. Кĕçĕнни Алеша 11-мĕш класс пĕтернĕ, экзаменсене ăнăçлă тытса физика профилĕпе çыхăннă профессие алла илме ĕмĕтленет.
Н.АРХИПОВА.
Источник: "Каçал Ен"