07 июня 2016 г.
Санкци таварĕсене тĕп туни юлашки вăхăтра, чăнах та, нумай калаçу çуратрĕ. Мĕн пытармалли - сивлекенсем те çук мар. Тỹрех калам, чикĕ урлă саккуна пăсса илсе килнĕ апат-çимĕç чи малтанах контрабанда шутланать. Унăн вара пахалăхĕ питĕ иккĕленỹллĕ. Эппин, вăл çыншăн хăрушсăр тееймĕн.
ЦИФРА ЭРНЕСЕРЕН УЛШĂНАТЬ
Çапла, Раççей Федерацийĕн Президенчĕн "Раççей Федерацине хăрушсăрлăхпа тивĕçтерес тĕллевпе усă курмалли уйрăм ятарлă экономика мерисем çинчен" Указа пурнăçланă май кăçалхи çу уйăхĕн 22-мĕшĕ тĕлне 4776 тонна саккунсăр ỹсен-тăран продукцине тытса чарнă, çав шутран 4630 тоннине тĕп тума тивнĕ. Çавăн пекех выльăх-чĕрлĕх продукцийĕн контрабандин çулне те пỹлнĕ: 244 тоннăран 182-шне утилизациленĕ.
Çак цифра эрнесерен улшăнса тăрать. Раççейĕн пур кĕтесĕнче те тенĕ пекех саккунсăр тавар сутнине тупса палăртаççĕ. Россельхознадзор специалисчĕсемпе пĕрле Роспотребнадзор тата прокуратура, таможня ĕçченĕсем тăрăшаççĕ.
Сăмах май, Россельхознадзор инспекторĕсем Беларуç чиккинче талăкĕпех тăраççĕ тесен те юрать. Асăннă указ тухнă хыççăн тата темиçе контроль посчĕ туса хунă. Калăпăр, Смоленск, Брянск, Псков облаçĕсенче. Вырăнти вăйпа кăна саккунсăр тавара чикĕ урлă каçарассине чарса лартма йывăртарах. Çавна май пирĕн тăрăхри специалистсем те чикĕре тăтăшах командировкăра пулаççĕ. Инспекторсем каласа панă тăрăх, тĕрĕслевре саккунсăр продукци кăна мар, вĕсемпе пĕрле сăтăрçăсем те тупса палăртнă.
Контроль посчĕсенче ирттернĕ мониторинг мероприятийĕсем "суя транзит" схемăна уçса панă та. Продукци малтан Казахстан Республикине çитет, кайран вăл Раççей территорийĕнче саланать.
Çак схемах-тăр 2015 çулхи сентябрь уйăхĕнче Раççей - Казахстан административлă чиккинчи тĕп автомагистральсенче 22 фитосанитари контроль пункчĕ йĕркелеме хистенĕ. Çав постсенче пĕлтĕр çулталăк вĕçлениччен 54 пин те 365 тонна тата 1 млн та 870 штук импорт продукцине тĕрĕсленĕ. Ỹсен-тăран карантинĕ енĕпе саккунлăха пăснине пула 15 пин те 169 тонна тиеве ăçтан илсе тухнă, çав çĕршывсене каялла тавăрнă.
ЧĂВАШ ЕНРЕ ВАРА?
Пирĕн тăрăхра та йĕркене уяман усламçăсем тупăннă. Акă çулталăк пуçламăшĕнчех Шупашкарти "Николаевский" суту-илỹ комплексĕнче Польшăран илсе килнĕ 100 килограма яхăн панулми куç тĕлне пулнă. Вĕсене Раççей Президенчĕн çỹлерех асăннă тата 2015 çулхи июнь уйăхĕн 24-мĕшĕнчи указĕсемпе килĕшỹллĕн тĕп тунă.
Çĕрпỹ районĕнчи "Çавал" базăра тупнă 95 кг панулмине те çак "шăпах кĕтнĕ". Ку парти те Польшăранах пулнă. Елчĕк районне те çитнĕ çак çĕршыв çимĕçĕ.
Турци помидорĕсене Вăрмар районĕнче тата Елчĕк районĕсенче асăрханă. Унта та, кунта та йывăр техника урапи айне пулнă вĕсем. Çавăн пекех саккуна пăсса илсе килнĕ иçĕм çырлин курупкисем те çĕрпе танлашнă.
Н.ВАСИЛЬЕВА,
Россельхознадзорăн Чăваш Республикинчи тата Ульяновск облаçĕнчи управленийĕн ĕçченĕ.
Источник: "Каçал Ен"