03 июня 2016 г.
Июнĕн 1-мĕшĕнче Раççей Федерацийĕн Правительствин Председателĕ Дмитрий Медведев видеоканашлу ирттернĕ.
Кун йĕркине кĕртнĕ чи çивĕч ыйтусенчен пĕри 2016 çулта ачасен çуллахи канăвне кирлĕ пек йĕркелесси пулнă. Юлашки çулсенче федераци тата регионсенчи влаçсем ачасен канăвне, сывлăхне çирĕплетессипе сахал мар ĕç тунине асăннă. "Ыйту регионсенчи патшалăх политикишĕн чи приоритетли", - тенĕ РФ Правительствин Председателĕ. Ачасен канăвне йĕркелеме Раççейри регионсене хушса тỹлемелли пулăшăва 4,6 млрд тенкĕ куçарма йышăнни çинчен ырă хыпар пĕлтернĕ. "Йывăр çемьесенче пурăнакансене, тăлăха юлнисене тỹлевсĕр путев-кăпа тивĕçтерме май пур. Кун пек йышăнăва "Единая Россия" форум ĕçĕнче кăçал мартăн 25-мĕшĕнче йышăннă. Куçакан пулăшупа тухăçлă усă курма хушнă. Кун йĕркинчи тепĕр ыйту - лагерьсем валли квалификациллĕ специалистсем хатĕрлесси. Ачасен апатланăвĕ çине те пысăк тимлĕх уйăрма чĕнсе каланă.
Раççей Федерацийĕн ĕçпе социаллă хỹтлĕх министрĕ Максим Топилин хăйĕн сăмахĕнче Чăваш Республикине ырланă, ачасене канма регионта çĕнĕ лагерьсем уçнине палăртнă.
Чăваш Республикин ĕçпе социаллă хỹтлĕх министрĕ Сергей Димитриев регионта пĕрремĕш сменăпа лагерьсенче 5248 ача канасса пĕлтернĕ. Регионта ачасен çуллахи канăвĕ валли пурĕ 900 учреждени хатĕрленĕ. Кăçал çул çитмен 16100 ачана ĕçпе тивĕçтерме палăртнă, вĕсенчен 12 пинĕшĕ йывăр çемьесенче çитĕнет. "Пирĕн пурин те пĕр тĕллев - ачасене канма условисем йĕркелесе парасси. Вĕсен апатланăвĕ те паха пулмалла. Ачасен лагерьсенчен савăк кăмăлпа таврăнмалла", - тенĕ Чăваш Республикин Пуçлăхĕ Михаил Игнатьев.
СĂМАХ МАЙ
Комсомольски районĕнче июнĕн 1-мĕшĕнчен 21 шкул çумĕнче канупа сывлăха çирĕплетмелли çуллахи лагерьсем ĕçлеме пикеннĕ. Вĕсене 763 вĕренекен çỹрет. 21-тен 7-шĕ - ĕçпе кану лагерĕсем. 763 ачаран 80-шĕ шăпах çав йышши лагерьсене çỹреме кăмăл тунă. Ачасен канăвне усăллă, кăсăклă, йĕркеллĕ ирттерес тесе район администрацийĕпе вĕренỹ пайĕ кирлĕ утăмсем тунă, укçа-тенкĕ çителĕклĕ уйăрнă. Çамрăксене кунне икĕ хутчен вĕри апат çитереççĕ.
Источник: "Каçал Ен"