31 мая 2016 г.
Пĕлỹ çурчĕсенче юлашки шăнкăрав янăрарĕ. Шкултан вĕренсе тухакансен хĕрỹ тапхăр пуçланчĕ. Майăн 27-мĕшĕнче шкул ачисем географи тата вырăс литературин предмечĕсемпе, майăн 30-мĕшĕнче - вырăс чĕлхипе экзамен тытрĕç. Июнĕн 2-мĕшĕнче математикăпа (база шайĕ), июнĕн 6-мĕшĕнче математика предмечĕпе (профиль шайĕ), июнĕн 8-мĕшĕнче обществознани, июнĕн 14-мĕшĕнче - биологи, июнĕн 10,11,14-мĕшĕсенче - ют чĕлхесем, июнĕн 16-мĕшĕнче - ИКТ тата истори предмечĕсемпе, июнĕн 20-мĕшĕнче хими, физика предмечĕсемпе экзамен памалла.
Кăçалтан истори, обществознани, географи, информатика предмечĕсемпе ППЭ тытакансен тест ыйтăвĕсене хуравлама тивмĕ. Роспотребнадзор пуçлăхĕ Сергей Кравцов пĕлтернĕ тăрăх, кăçал 7 предметпа тест пайне кăларнă. Унăн шухăшĕпе, ППЭ куллен çырса пурнăçламалли ахаль ĕçе çаврăнать. Истори предмечĕпе тест пайне сочинени çырассипе улăштарнă.
Пĕлтĕр математикăпа, ют чĕлхепе тата обществознани предмечĕсемпе аслă шкула вĕренме кĕмелли балсене ỹстернĕччĕ. Чăваш Республикин Вĕренỹ министерстви пĕлтернĕ тăрăх, вĕсене текех улăштармаççĕ. Аслă шкула вĕренме кĕрес тĕллевлисен вырăс чĕлхипе вăтамран - 36, математика профиль шайĕпе 27, историпе - 32, биологипе - 36, вырăс литературипе 32 балл пухмалла. Алла аттестат илес тесен математикăпа база шайне "виççĕллĕх" çырмалла, вырăс чĕлхипе 24 балран кая мар пухмалла.
2016 çулхи çĕнĕлĕхсенчен пĕри - обществознани предмечĕпе экзамен валли ятарлă кун уйăрни. Çакна экзамен тытакансем йышлă пулнине шута илсе тунă. Ют чĕлхепе сăмах вĕççĕн хуравламалли пай валли те икĕ кун уйăрнă.
РФ Вĕренỹ тата ăслăлăх министерстви ППЭ ирттермелли йĕркене улшăнусем кĕртнĕ. Сăмахран, экзамен пулман аудиторисене пурне те пичет лартсах питĕреççĕ, пỹлĕмсенчи стендсемпе плакатсене илĕç. ППЭ йĕркине пăсакансене çийĕнчех тупса палăртас тĕллевпе экзамен ирттерекен пунктсене видеосăнав хатĕрĕсем вырнаçтарнă. Экзамен мĕнле иртнипе паллашма сăнакан центрсенче онлайн мелпе пăхса тăрĕç. Кăçалтан ППЭ пункчĕсенче тухтăр та пулĕ. Тьюторсене те кĕме ирĕк панă. Çĕнĕ йĕркепе килĕшỹллĕн тата ППЭ хуравĕсене тата экзамен пункчĕсенче ỹкернĕ видеофильмсене тепĕр çулхи мартăн 1-мĕшĕччен упрĕç.
Экзаменри тĕрĕслев йĕрки çулран çул çирĕпленсе пыни шкултан вĕренсе тухакана çеç мар, вĕсен ашшĕ-амăшне те сехĕрлентерет. Рособрнадзор сайтĕнче вун-вун ыйту вырнаçтарнă. Вĕсенчен пĕри - историпе ют чĕлхе предмечĕсене тĕп предметсен йышне кĕр-тесси. Тепĕр икĕ çултан чăннипех те пур выпускник та ют чĕлхепе пĕрлехи патшалăх экзаменĕ тытĕ. Экзаменсем вун-вун ыйту çуратаççĕ. Унпа çыхăннă нумай хыпарпа, çĕнĕлĕхсемпе Рособрнадзорăн сайтĕнче туллинрех паллашма пулать.
Кăçал пирĕн районти 161 выпускник ППЭ тытать. Тĕп предметсемпе экзаменсем Комсомольски 2-мĕш вăтам шкулĕнче иртеççĕ. Ытти предметсемпе Патăрьел, Елчĕк районĕсенчи тата Шупашкарти 10-мĕш шкулта экзамен тытаççĕ. Пĕрлехи патшалăх экзаменĕсен пĕрремĕш тапхăрĕнче Чăваш Енре 6742 хĕрпе каччă хутшăннă, вĕсен йышĕнче пирĕн район вĕренекенĕсем пулман.
Пичетри материалсемпе А.ЕФРЕМОВА хатĕрленĕ.
Источник: "Каçал Ен"