24 мая 2016 г.
Майăн 22-мĕшĕнче Чăваш Республикинче пурăнакансем "Единая Россия" партин чи тивĕçлĕ кандидачĕсене вĕсен интересĕсене Раççей Федерацийĕн Патшалăх Думинче тата Чăваш Республикин Патшалăх Канашĕнче хỹтĕлеме тăратрĕç. Малтанхи сасăлавăн пĕтĕмлетĕвĕсемпе РФ Патшалăх Думин тата ЧР Патшалăх Канашĕн кăçал сентябрь уйăхĕнче иртекен суйлавĕсене хутшăнакан кандидатсен списокне хатĕрлеççĕ. Çакна палăртмалла, "Единая Россия" парти - паян çĕршывра саккун кăларакан влаç органне депутата суйлама кандидата тăратнă чухне уçă та демократиллĕ меслетпе усă куракан пĕртен-пĕр политика партийĕ. Акă, РФ Патшалăх Думин Вĕренỹ енĕпе ĕçлекен комитечĕн председателĕн çумĕ Алена Аршинова И.Н.Ульянов ячĕллĕ Чăваш патшалăх университетĕнчи участокра ирех сасăланă. Вăл "Единая Россия" парти çакнашкал утăм туни питĕ лайăх тесе хаклать: "Çынсем депутат пулас текенсем мĕн тума пултарнине хăйсем курса ĕненеççĕ. Ку вăл кандидатсемшĕн те питĕ лайăх шкул".
Малтанхи сасăлава суйлав умĕнхи тĕп "репетици" теме те пулать, Чăваш Енре пурăнакансем суйлав участокĕсене çав тери йышлăн килнĕ. Ытти суйлавçăсемпе танах Чăваш Республикин Пуçлăхĕ Михаил Игнатьев та черет кĕтсе тăнă. Вăл суйлава хăйĕн çемйипе - Шупашкарти Петĕр Хусанкай ячĕллĕ культура керменне - савăнăçлă кăмăлпа килнĕ. Черетре тăнă вăхăтра çынсемпе калаçнă, вĕсен шухăш-кăмăлне ыйтса пĕлнĕ. "Сасăлав участокĕсене килнисене республика тата пирĕн çĕршыв шăпи пăшăрхантарать, вĕсем лăпкăлăхпа килĕшỹре пурăнасшăн, обществăлла политика лару-тăрăвĕн çирĕплĕхне мала хураççĕ Чăваш Енре пурăнакансем, çакă вара ыранхи куна шанма май парать те", - палăртса каланă вăл.
Николай Малов суйлавçă пулса малтанхисенчен пĕрремĕш тăван Етĕрне хулинче сасăланă. Ун хыççăн тỹрремĕнех малтанхи сасăлава хутшăнакансен тата "Единая Россия" партин регионти уйрăмĕн ертỹçи Шупашкарти тата Çĕнĕ Шупашкарти темиçе шутлав участокĕнче пулнă. "Эпир хамăр суйлавçăсемпе уççăн калаçатпăр, вĕсемпе канашлатпăр тата сентябрĕн 18-мĕшĕнче "Единая Россия" партин йышĕнчен суйлав участокĕсенче кама курасшăн пулнипе интересленетпĕр", - палăртнă вăл.
Чăваш Енре пĕтĕмпе 236 шутлав участокĕ ĕçлерĕ. Йĕркелỹ комитечĕ малтанхи сасăлав кăтартăвĕсене май уйăхĕн 25-мĕшĕнче пĕтĕмлетĕ.
Сергей Николаевич МАКАРОВ,
Комсомольскинчи "Коммунальный сервис" ООО ертỹçи:
- Вырсарникун, майăн 22-мĕшĕнче, республикăра "Единая Россия" партин малтанхи сасăлавне районта пурăнакансем хастар хутшăнни чăннипех те аван. Эпир, суйлавçăсем, участоксене лайăх кăмăл-туйăмпа çитрĕмĕр. Районта пурăнакансемшĕн çак кун чăнласах та пысăк уява çаврăнчĕ. Юрă-ташă кăмăла çĕклерĕ. Çынсем малтанхи сасăлав пĕтĕмлетĕвĕсемпе РФ Патшалăх Думин тата ЧР Патшалăх Канашĕн кăçал авăн уйăхĕнче иртекен суйлавĕсене хутшăнакан кандидатсен списокне хатĕрленине лайăх пĕлеççĕ. Çавăнпа эпир сентябрь уйăхĕнчи суйлавра пирĕн интерессене хỹтĕлеме пултаракан кандидатсене курасшăн. Çак тĕллевпех кашниех малтанхи сасăлава хутшăнма тăрăшрăмăр. Паян эпир чи тивĕçлисемшĕн сасăларăмăр. "Единая Россия" парти малтанхи сасăлава йĕркелени - çынсемшĕн те, кандидатсемшĕн те яваплă утăм.
Источник: "Каçал Ен"