20 мая 2016 г.
Пушар хăрушсăрлăхĕн правилисене епле пăхăннипе пăхăнманнине тĕрĕслес, пушарсен сиенĕ пирки асăрхаттарас тĕллевпе районти патшалăх надзор уйрăмĕн начальникĕ Димитрий Кузьмин, 31-мĕш пушар чаçĕн ертỹçи Сергей Алексеев çак кунсенче ача сачĕсенче пулчĕç.
Унсăр пуçне Димитрий Кузьмин ача сачĕсен ĕçченĕсемпе кĕске инструктаж ирттерчĕ, вут-çулăм ан тухтăр тесен чи малтанах пушар хăрушсăрлăхĕн правилисене асра тытмаллине, васкавлă пулăшу номерĕсене аса илтерчĕ.
"Пилеш", "Асамат кĕперĕ", "Пучах" ача сачĕсенче, пĕтĕмĕшле каласан, лару-тăру йĕркеллех. Çитменлĕхсем пур паллах: эвакуаци çулĕсенче кирлĕ-кирлĕ мар япаласем пур, хăш-пĕр ятарлă паллăсем вырăнта мар е çук, эвакуаци планĕсене улăштармалла, каçпа курăнакан хутран хатĕрлемелле тата ытти те... Çавăнпа пĕрлех ача сачĕсенче кашнинчех ятарлă стендсем, ачасене выляв формачĕпе пушар хăрушлăхĕ пирки вĕрентмелли кĕтессем пур. Пĕчĕкскерсене пушар хăрушсăрлăхĕн правилисене час-часах аса илтерсе тăраççĕ, тĕрлĕ уроксем ирттереççĕ. "Асамат кĕперĕ" ача садĕнче вара нумаях пулмасть "Пушар хăрушсăрлăхĕ" темăпа ỹкерчĕксен конкурсне йĕркеленĕ, ачасен ĕçĕсем халĕ те пĕр стенана илемлетсе тăраççĕ. Пепкесене садикренех пушар хăрушлăхĕ пирки вĕрентни усăллă пуласса шанас килет.
Н.АРХИПОВА.
Источник: "Каçал Ен"