17 мая 2016 г.
Алена Аршинова "Единая Россия" партин "Ача сачĕсем - ачасене" федераци проектне ертсе пырать, Патшалăх Думин вĕренỹ енĕпе ĕçлекен комитечĕн шкулчченхи вĕренỹ Эксперт совечĕн ĕçне йĕркелет. Çавăн пекех студентсене, преподавательсене тĕрлĕ ыйтăва татса пама пулăшать.
Вăрттăнлăх мар, Патшалăх Думин пур депутачĕ те хăйĕн тивĕçĕсене кирлĕ пек пурнăçламасть. Хăшĕ-пĕрисем вара канашлу залĕсене те васкамаççĕ. Алена Аршинова кун пеккисен йышĕнчен мар. "Нумайăшĕ мана çакă мĕн тума кирлине, мĕншĕн талăкĕпех ĕçленипе кăсăкланаççĕ. Эпĕ тахçантанпах çапла пурăнатăп, çынсемшĕн усăллă пулас килет", - тет Алена Аршинова.
Тăрăшса ĕçлени тỹрремĕнех курăнать. Вăл хутшăннипе ача сачĕсене тума тата реконструкцилеме федераци бюджетĕнчен Чăваш Ен валли 1,6 млрд тенкĕ явăçтарнă. Асăннă укçа-тенкĕпе 33 ача садне ĕçе кĕртнĕ. 12 пин ытла чăваш ачине садиксенче вырăнпа тивĕçтернĕ.
2013 çулта Аршинова пуçарăвĕпе ача сачĕсене тума тата вĕсене реконструкцилеме уйăракан субсидие шутлас йĕркен методикине улăштарнă. Çавна май Чăваш Ене планпа палăртнинчен ытларах укçа-тенкĕ килнĕ, 2013 çулта 480 млн тенкĕ уйăрма палăртнă, каярах вара 614 млн тенкĕ килнĕ.
"Чылай регионта ача садне çỹренĕшĕн ытларах тỹлени паллă. Вĕренỹ енĕпе ĕçлекен комитет, эпир тỹлевĕн уçă та курăмлă методикине йышăнтăмăр. Халĕ ашшĕ-амăшĕн тỹлевĕн механизмне пĕтĕмпех регламентациленĕ. Çавăн пекех эпĕ РФ Налук Кодексне ашшĕ-амăшĕн тỹлевне НДС-ран хăтарма улшăнусем кĕртмеллине пуçартăм. Ача сачĕсем Раççейри кашни çемьешĕн юрăхлă пулччăр, - уйрăммăн палăртать Аршинова.
Алена Аршинова Чăваш Ене ял шкулĕсенчи спортзалсене юсамалли тата реконструкцилемелли федераци программине кĕртес тесе мĕн килнине пĕтĕмпех тунă. Çавна май республикăри 72 шкулти спортзала юсаса çĕнетме май килнĕ, çулталăк вĕçĕ тĕлне тата 24-шне юсамалла.
Чăваш Ен депутачĕ çар ĕçĕн ветеранĕсене, тăлăх ачасен, ашшĕ-амăшĕн хỹтлĕхĕсĕр юлнă ачасене аслă вĕренỹ заведенийĕсене вĕренме кĕмелли çăмăллăхсене сыхласа хăварма пулăшнă.
Çĕнĕ шкулсем тăвас, реконструкцилес программа та тухăçлă ĕçлеме пуçларĕ. Ăна "Единая Россия" парти пуçарнă, РФ премьер-министрĕ Дмитрий Медведев ырланă. Кăçал асăннă программăпа килĕшỹллĕн Чăваш Енри шкулсем валли 583 млн тенкĕ уйăрмалла. Çавна май çĕнĕ икĕ шкул тума тытăнмалла, тăватă шкула реконструкцилемелле.
Алена Аршинова шухăш-кăмăлĕпе, çĕнĕ программăпа Чăваш Ен шкулĕсем çĕнелĕç тата паянхи кун ыйтăвне тивĕçтерĕç.
Источник: "Каçал Ен"